Палітзняволены Арцём Дубскі пераведзены ў Бабруйскае СІЗА

Актывіст «Маладога фронту» будзе знаходзіцца ў следчым ізалятары да разгляду ягонай справы вышэйшымі інстанцыямі.

Аб тым, што Арцём Дубскі змешчаны ў Бабруйскае СІЗА, прэс-службе «Маладога фронта» паведаміў дзяжурны Асіповіцкага РАУС.

У следчым ізалятары палітвязень будзе знаходзіцца да перагляду крымінальнай справы вышэйшымі інстанцыямі.

Нагадаем, што 7 ліпеня Актывіст «Маладога Фронту» Арцём Дубскі быў арыштаваны ў зале Асіповіцкага раённага суда.

Апазіцыянера прызналі вінаватым у парушэнні правілаў адбывання пакарання ў выглядзе абмежавання волі. 22 красавіка 2008 года Дубскі быў прысуджаны да двух год абмежавання волі за ўдзел у акцыі прадпрымальнікаў, якая прайшла ў студзені таго ж году ў Менску. Моладзевы актывіст быў вымушаны з'ехаць ва Ўкраіну ў сувязі з тым, што супрацоўнікі міліцыі вынеслі яму два надуманых папярэджання аб парушэнні правілаў адбывання пакарання. Дубскі быў затрыманы 13 лютага 2009 года ў Гомелі, калі ехаў у Менск, каб прыняць удзел у акцыі ў гонар дня святога Валянціна. Апазіцыянера даставілі ў ізалятар у Асіповічах (па месцы жыхарства), а пасля перавялі ў ізалятар у Бабруйску. 15 красавіка Дубскага вызвалілі пад падпіску аб невыяздзе

Нагадаем, што «Справа 14-ці» – справа па арт. 342 Крымінальнага кодэкса Рэспублікі Беларусь, узбуджаная ў адносінах ўдзельнікаў мірнай акцыі пратэсту прадпрымальнікаў, якая прайшла ў Менску 10 студзеня 2008 года.

За ўдзел у гэтай акцыі 14 моладзевых актывістаў былі прысуджаныя да розных тэрмінаў пазбаўлення і абмежаванні волі. Міжнародная праваабарончая арганізацыя «Amnesty International» у 2009 годзе прызнала ўдзельнікаў «Працэсу 14-ці» Вязнямі сумлення.