Бел-чырвона-белы сцяг лунае над Плешчаніцамі (Фота)

Актывісты грамадзянскай кампаніі «Еўрапейская Беларусь» працягваюць кампанію па вывешванні нацыянальных сцягоў.

Чарговае палотнішча было ўзнятае над гарадскім пасёлкам Плешчаніцы (Лагойскі раён, Менская вобласць). Апазіцыянеры замацавалі бел-чырвона-белы сцяг на вышцы вышынёй у 100 метраў, якая праглядаецца з усіх канцоў горада, а таксама з трасы Менск-Віцебск, паведамляе jeans-by.com. У апошні час нацыянальныя сцягі ўсё часцей сталі з'яўляцца ў рэгіёнах Беларусі.

Нагадаем, што з 14 красавіка па 14 мая ў перадпачатку гадавіны рэферэндуму аб змене нацыянальных сімвалаў прайшла першая акцыя з патрабаваннем легалізавання бел-чырвона-белага сцяга. Тады нацыянальныя палотнішчы з'яўляліся над цэнтрам Менска штодня. C 14 чэрвеня акцыя працягнулася. Зараз сцягі над горадам будуць з'яўляцца стала да таго моманту, пакуль улады не адменяць забарону на іх публічнае выкарыстанне і не вернуць бел-чырвона-беламу сцягу статус нацыянальнай сімволікі. Акрамя таго, бел-чырвона-белыя сцягі будуць з'яўляцца і ў іншых беларускіх гарадах.