Пракуратура вынесла папярэджанне рэдактару часопіса Саюза палякаў

Пракуратура Гарадзенскай вобласці палічыла, што часопіс «Magazyn Polski na uchodz'stwie» парушае беларускае заканадаўства.

Як паведаміў «Радыё Рацыя» рэдактар выдання Ігар Банцар, падставай для вынясення папярэджання стала яго прафесійная дзейнасць і той факт, што часопіс непрызнанага ўладамі Саюза палякаў у Беларусі на чале з Анжалікай Борыс не прытрымваецца выходных звестак, якіх патрабуе беларускае заканадаўства:

«Ужо 5 гадоў «Magazyn Polski na uchodz'stwie» («Часопіс Польскі ў выгнанні») выдаецца ў такім фармаце, і толькі зараз упершыню папярэдзілі галоўнага рэдактара нібыта за неадпаведнасць Закону аб друку. Я адназначна разглядаю сітуацыю, якая склалася, ў кантэксце зместу травеньскага нумара», -- кажа Ігар Банцар.

У канцы чэрвеня супрацоўнікі міліцыі канфіскавалі прыкладна 70 асобнікаў часопіса «Magazyn Polski na uchodz'stwie», на вокладцы якога быў размешчаны калаж з малюнкам Аляксандра Лукашэнкі ў выглядзе расейскага цара Аляксандра ІІІ. Акрамя таго, у гэтым нумары часопіса быў надрукаваны крытычны артыкул Анджэя Пісальніка пад загалоўкам «Коля павінен стаць прэзідэнтам».