Непрызнаная Паўднёвая Асеція хоча ў неіснуючую «саюзную дзяржаву»
10- 21.08.2009, 16:10
Паўднёвая Асеція будзе дамагацца ўваходжання ў склад «саюзнай дзяржавы» Беларусі і Расеі.
Пра гэта 21 жніўня ў Маскве заявіў журналістам кіраўнік непрызнанай рэспублікі Эдуард Какойты.
У прыватнасці, адказваючы на пытанне аб перспектывах далучэння Паўднёвай Асеціі да «саюзнай дзяржавы», Какойты сказаў: «Мы з вялікім задавальненнем будзем дамагацца гэтага».
Ён таксама не выключыў, што Беларусь у хуткім часе прызнае незалежнасць Паўднёвай Асеціі.
«Апроч Беларусі сёння шэраг дзяржаў разглядаюць пытанне прызнання Паўднёвай Асеціі і Абхазіі», — сказаў Какойты.
Нагадаем, Расея прызнала незалежнасць Абхазіі і Паўднёвай Асеціі ў канцы жніўня 2008 года. Апроч Расеі незалежнасць Абхазіі і Паўднёвай Асеціі прызнала толькі Нікарагуа. Грузія ў адказ на гэта разарвала дыпламатычныя адносіны з Расеяй і абвесціла Абхазію і Паўднёвую Асецію акупаванымі тэрыторыямі.
Звароты Абхазіі і Паўднёвай Асеціі з просьбаю прызнаць іх незалежнасць паступілі ў беларускі «парламент» у канцы 2008 года. У дадзены момант парламенцкія камісіі іх вывучаюць.
