Беларускі дыктатар абмеркаваў з Барадзіным праект «саюзнага» Канстытуцыйнага акту

Аляксандр Лукашэнка 17 верасня правёў працоўную сустрэчу з дзяржсакратаром «саюзнай дзяржавы» Паўлам Барадзіным.

Былі абмеркаваныя пытанні парадку дня паседжання Вышэйшага Дзяржсавета, які мае адбыцца. На гэты момант падрыхтаваныя два варыянты парадка дня. На абмеркаванне кіраўнікоў дзяржаваў прапаноўваецца вынесці пытанні выканання бюджэту, фінансава-крэдытнай палітыкі, рэалізацыі саюзных праграмаў, пытанні занятасці насельніцтва. Акрамя таго, мяркуецца надаць увагу некаторым праблемным пытанням, не вырашаным на сённяшні дзень двума краінамі, паведамляе БелаПАН.

Гаворка ішла таксама пра праект бюджэту «саюзнай дзяржавы» на 2010 год. Мяркуецца, што ён будзе павялічаны на 15-20%. Як адзначыў Павал Барадзін, «саюзны» бюджэт з'яўляецца своеасаблівым гарантам вытворчых праграмаў.

Акрамя таго, на сустрэчы разглядаўся праект Канстытуцыйнага акту, у прыватнасці формы і метады саюзнага будаўніцтва. Дзяржсакратар «саюзнай дзяржавы» падкрэсліў, што «гаворка не ішла аб прэзідэнтах, прэм'ерах і саюзных міністрах». Абмяркоўваліся пытанні канфедэратыўнай прылады, працы камісіяў па галінах, дэлегавання паўнамоцтваў.

Павал Барадзін прывёў прыклад працы Еўракамісіі па сельскай гаспадарцы, якая ў год складае 800 балансаў. У «саюзнай дзяржаве» ж часам «няма дамоўленасці і па двух-трох пазіцыях». «Гэта пытанне калегіяльнага стаўлення і галіновага падыходу да праблемаў», - адзначыў дзяржсакратар «саюзнай дзяржавы».

Аляксандр Лукашэнка і Павал Барадзін падрабязна абмеркавалі таксама пытанні міграцыйнай палітыкі, гандлёва-эканамічнага ўзаемадзеяння.

Сёлета спаўняецца 10 годаў «саюзнай дзяржаве». Як падкрэсліў у гэтай сувязі Аляксандр Лукашэнка, «народы Беларусі і Расеі жывуць практычна ў адной дзяржаве, а таму час нарэшце вырашыць усе праблемы, якія замінаюць «саюзнаму» будаўніцтву».