Бельгійскія фермеры вылілі на палі амаль тры мільёны літраў малака (Фота)

Акцыя пратэсту была накіравана супраць зніжэння закупачных коштаў на малако і малочныя прадукты.

Бельгійскія фермеры вылілі тры мільёны літраў малака на поле ў раёне горада Сіне ва франкамоўнай частцы краіны, паведамляе сайт «Еўрапейская Беларусь» са спасылкай на «Euronews».

Нягледзячы на тое, што асноўныя прафсаюзы не падтрымалі аграрыяў, з пятніцы сельгасвытворцы пачалі шырокамаштабны страйк, адмовіўшыся пастаўляць малако ў гандлёвыя сеткі краіны.

«Мы праводзілі акцыі пратэсту ў Валоніі ўсе выходныя, а сёння мы прывезлі сюды столькі малака, сколькі ў Валоніі вырабляецца за дзень. І калі прафсаюзы не хочуць нам дапамагчы, абыйдземся без іх», – заявіў адзін з бельгійскіх фермераў.

За апошні год закупачныя кошты на многія віды сельгаспрадукцыі рэзка знізіліся. Перадусім, гэта закранула малочную гаспадарку.

Еўрапейскія аграрыі патрабуюць абмежаваць вытворчасць малочнай прадукцыі ў ЕЗ, увесці нацыянальныя квоты на вытворчасць малака і адмовіцца ад палітыкі Еўразвяза па паступовай адмене квотаў на сельскагаспадарчую прадукцыю да 2015 года.