Грошай на зарплату няма: з працоўнымі расплачваюцца «натурай»

Працоўным Менскага маторнага заводу рэкамендавана пакідаць на заводзе 20% заробку.

«Кіраўніцтва «Менскага маторнага завода» у якасці антыкрызіснай меры рэкамендавала кожнаму працаўніку пакідаць 20% зарабатнай платы на заводзе. Адна з эфектыўных мер стабілізацыі становішча - павелічэнне аб'ёму рэалізацыі прадуктаў харчавання, іншых тавараў праз завадскую гандлёвую сетку па безнаяўнай аплаце - у кошт будучай зарабатнай платы», - паведамляе «Інтэрфакс» са спасылкай на газету «Маторабудаўнік».

Так, кожнаму працаўніку ММЗ рэкамендавана пакідаць на заводзе 20% заробку, разлічваючыся па прапусках за абеды ў сталовых, за прадукты і ТНС уласнай вытворчасці ў гандлёвых кропках прадпрыемства, а таксама за паслугі стаматалогіі, транспартнага і рамонтна-будаўнічых цэхаў.

Пры гэтым, як адзначае газета, асартымент прадукцыі, якую супрацоўнікі прадпрыемства могуць набыць у кошт зарплаты, вузкі, паколькі ў ММЗ вялікая запазычанасць перад пастаўшчыкамі гэтай прадукцыі. «Выклікае нараканні асартымент прадукатаў харчавання: у прыватнасці, адсутнасць самых папулярных марак цыгарэт, дастатковай колькасці і разнастайнасці свежага мяса і мясных паўфабрыкатаў, рыбы, вэнджаніны», - піша газета. Акрамя таго, супрацоўнікі ММЗ незадаволеныя высокімі коштамі на малако на завадскіх прылаўках.

Паміж тым, рэкамендацыя пакідаць 20% зарабатнай платы на заводзе не першая антыкрызісная мера, якая прадпрымаецца ММЗ. Як паведамлялі раней Інтэрнэт-СМІ, «Менскі маторны завод» пачаў закупляць мяса, разлічваючыся пастаўкай дызельных рухавікоў, запасных частак, а таксама трактароў МТЗ і пагрузчыкаў «Амкадор».

Так, ААТ «Менскі трактарны завод» быў павінен грошы ММЗ і аддаў пазыку трактарамі. Як апынулася, трактары на Маторным заводзе каштуюць тры тоны мяса. Пры сярэдняй вазе дарослай свінні ў 120 кілаграмаў, новы трактар калгасу будзе каштаваць 25 свінняў.

Зараз ММЗ шукае калгасы, якія б забралі тэхніку наўзамен свінняў і кароў. Мяса, у сваю чаргу, купляюць працаўнікі заводу ў кошт зарплаты.

На некаторых беларускіх прадпрыемствах прапануюць атрымліваць ежу ў кошт зарабатнай платы. Так, на Менскім трактарным заводзе працоўным прапануюць браць пяльмені са сталовай у крэдыт. З нядаўніх часоў на Барысаўскім заводзе аўтатрактарнага электраабсталявання (БАТЭ) зарплату можна часткова атрымліваць сырам і малаком.