Савет Еўропы праводзіць у Менску выставу «Смерць - гэта не правасуддзе»
3- 8.10.2010, 17:20
Беларусь застаецца адзінай еўрапейскай краінай, у якой прымяняецца смяротнае пакаранне.
Як паведамляе «Інтэрфакс-Захад», у пятніцу ў Менску, у Музеі гісторыі Вялікай Айчыннай вайны, адкрылася выстава «Смерць - гэта не правасуддзе», дзе прадстаўлена 100 плакатаў, адабраных у рамках конкурсу, які прайшоў пад патранажам генеральнага сакратара Савета Еўропы Турб'ёрна Ягланда і прысвечанага скасаванню смяротнага пакарання.
Экспазіцыя ў Менску будзе працаваць з 9 кастрычніка па 11 снежня 2010 года, уваход на яе бясплатны. Яе арганізатарамі выступілі Савет Еўропы і яго інфармацыйны пункт у Менску, а таксама прадстаўніцтва Еўразвяза ў Беларусі.
«Савет Еўропы адыгрывае вядучую ролю ў барацьбе за скасаванне смяротнага пакарання, з 1997 года смяротнае пакаранне не ўжываецца ні ў адной краіне Еўропы, акрамя Беларусі», - адзначылі ў прэс-службе СЕ.
Скасаванне смяротнага пакарання ці ўвядзенне мараторыя на яго прымяненне з'яўляецца адным з важнейшых умоваў прадастаўлення Беларусі статусу спецыяльнага запрошанага ў Парламенцкай асамблеі Савета Еўропы.
На цырымоніі адкрыцця выставы, якая будзе праходзіць у Беларусі да канца снежня гэтага года, прымаюць удзел в. а. кіраўніка дэлегацыі ЕЗ у Беларусі Жан-Эрык Хольцапфель, Надзвычайны і Паўнамоцны амбасадар Венгрыі ў Беларусі Ферэнц Контра, прадстаўнік генеральнага дырэктарата Савета Еўропы па дэмакратыі і палітычных пытаннях Данііл Хачаба.
Як паведамляе БелаПАН, выстава будзе праходзіць адначасова больш чым у трыццаці гарадах па ўсім свеце, у тым ліку ў Арганізацыі Аб'яднаных Нацый у Нью-Ёрку і ў Еўрапейскім парламенце ў Брусэлі. Так 10 кастрычніка будзе адзначаны Міжнародны дзень барацьбы супраць смяротнага пакарання.
«Смерць - гэта не правасуддзе» з'яўляецца таксама лозунгам кампаніі Савета Еўропы, накіраванай на адзінства еўрапейскіх грамадзян у барацьбе за скасаванне смяротнага пакарання.
«З дапамогай гэтай выставы мы хочам данесці да грамадскасці, чаму смяротнае пакаранне, таксама не мае апраўданняў, скасоўваецца паўсюль у свеце і чаму яно павінна быць забароненае», - заявіў генеральны сакратар Савета Еўропы Турб'ёрн Ягланд.
