Лукашэнка: Мы не настойваем на прызнанні выбараў Расеяй

Па словах беларускага дыктатара, ён «не памрэ», калі РФ не прызнае прэзідэнцкія выбары.

Беларусь не будзе настойваць на прызнанні прэзідэнцкіх выбараў Расеяй. Пра гэта Аляксандр Лукашэнка заявіў у інтэрв'ю найбуйнейшым СМІ Германіі, паведамляе БелТA.

«Гэта справа Расеі - прызнаваць ці не прызнаваць. Гэта яе права, яе суверэннае права. І мы да гэтага будзем ставіцца ўважліва», - сказаў кіраўнік. «Па нашых законах мы не маем патрэбу ні ў якіх прызнаннях. Вы паўтара дзясятка гадоў не прызнавалі наогул таго, што існуе такая Беларусь, не кажучы ўжо пра выбары. Ну і што, мы ад гэтага памерлі?» - адзначыў ён.

Аляксандр Лукашэнка лічыць, што няма падставаў для непакою ў тым, што Беларусь і Расея не пакінуць у мінулым рознагалоссі. «Не хвалюйцеся, мы дамовімся з Расеяй, таму што нам ад гэтага нікуды не падзецца, таму што мы фактычна адзін народ, мы самыя блізкія народы - беларускі і рускі, якія практычна нічым не адрозніваемся адзін ад аднаго. Але толькі пры адной умове: што на гэтай зямлі беларускай ёсць дзяржава, ёсць народ, і гэта - суверэнная і незалежная дзяржава з уласнымі інтарэсамі, і з намі трэба лічыцца, ці то Германіі, ці то Расеі. Усё астатняе з галіны «падабаецца - не падабаецца», - сказаў ён.

Беларускі кіраўнік не лічыць, што на развіцці двухбаковых стасункаў паміж Беларуссю і Расеяй будзе нейкім чынам адбівацца тое, хто стане на чале Расеі на выбарах у 2012 года. «Гэта нюанс. Гэта неістотна. Я думаю, што, як бы мы не падабаліся адзін адному, прэзідэнты Беларусі, Расеі, прэм'ер-міністры, ёсць штосьці больш важнае, якое крыецца не ў суб'ектыўным, а ў аб'ектыўным», - сказаў ён.

Што ж датычыць прэзідэнцкіх выбараў у Беларусі, дык, на думку Аляксандра Лукашэнкі, у рэспубліцы залішне спрабуюць пераканаць увесь свет у сумленнасці выбараў. «Вы ведаеце, я часам лаўлю сябе на думцы, што я і мае калегі, ужо занадта мы шмат спрабуем пераканаць вас у тым, што ў нас выбары былі сумленнымі і будуць сумленнымі, - сказаў ён. - Мы спрабуем вас пераканаць яшчэ ў тым, што ў нас выбары пройдуць па законе. Вам штосьці не падабаецца сёння ў нашых выбарах? Скажыце, дзе мы парушылі Канстытуцыю і нашыя законы? Калі такіх парушэнняў няма, дык будзьце ласкавыя пагадзіцца з намі».

«Калі вы хочаце бачыць, што белае - гэта чорнае, дык, як бы я вас ні пераконваў, вы будзеце спасылацца ці то на тэрміналогію, ці то яшчэ на штосьці, але вы будзеце гэта бачыць у чорным колеры. І я вас ніколі не разупэўню ў гэтым», - дадаў Лукашэнка.

Ён лічыць, што палітычная і эканамічная сістэма ў краіне павінна стварацца зыходзячы з рэаліяў яе жыцця. «Свет вельмі разнастайны, таму і формы праявы гэтай разнастайнасці абсалютна розныя. Чаму мы павінны быць абавязкова да вас падобныя?! Не ведаю. У нас свае традыцыі, у нас свой менталітэт, у нас свой народ, у нас свае інтарэсы. І зыходзячы з гэтых аргументаў і шмат якіх іншых, мы будзем будаваць сваё жыццё і ствараць сістэмы, у тым ліку кіравання, улады, і гэтак далей. Не важна, пад якімі тэрмінамі гэта прагучыць. Усё павінна паходзіць з канкрэтыкі, з тых рэаліяў, у якіх знаходзіцца дзяржава і грамадства», - сказаў кіраўнік.

«Мы стварылі пэўную палітычную сістэму, у тым ліку сістэму ўлады, гэтая сістэма можа вам падабацца, можа, не падабацца, але яна такая існуе. І, ствараючы гэтую сістэму, мы зыходзілі з таго, якія былі рэаліі ў нас у краіне. Мы яе не для немцаў стваралі і не для таго, каб вам спадабацца. А для таго, каб выратаваць сваю дзяржаву і свой народ пасля таго, як Савецкі Саюз разваліўся на кавалкі. І тыя задачы, якія мы паспрабавалі вырашыць, ствараючы гэтую сістэму, у тым ліку задачы ўлады, мы вырашылі. І нашая сістэма эвалюцыянуе, яна развіваецца. Можа быць, не так хутка, як хочацца немцам, але мы развіваемся такімі тэмпамі, якімі дазваляе нам развівацца нашае грамадства і нашая эканоміка», - сказаў дыктатар.