Сваякі загінулых: На «Пінскдрэве» яны працавалі як катаржнікі
34- 3.11.2010, 15:10
Выбух 25 кастрычніка ў будынку цэха ДСП канцэрна «Пінскдрэў» забраў жыцці 14 чалавек.
Шэсць пацярпелых зараз знаходзяцца ў цяжкім стане ў шпіталях Берасця і Менска. Нацыянальная жалоба не абвешчана, перадае «Радыё Свабода».
2 лістапада ў Пінску на гарадскіх могілках быў пахаваны 51-гадовы Аляксандр Хамлюк. Ён працаваў аператарам аўтаматычных ліній на ЗАТ «Пінскдрэў».
Родная сястра Аляксандра Хамлюка Алена кажа, што яе брат загінуў з прычыны недагляду кіраўнікоў і інжынераў, якія не клапаціліся пра стан абсталявання па вытворчасці плітаў ДСП:
«Гэта ўсё з-за халатнасці і бязладнасці. Калі б фільтры замянілі своечасова, калі б чысцілі кацёл своечасова, гэтага не здарылася б. Не было б столькі ахвяраў. Гэта ўсё з-за іх халатнасці, кіраўніцтва не прымала ніякіх мераў. Працоўныя прасілі: «Дайце распіратары, дайце, няма чым дыхаць». А яны ў адказ: «У «Пінскдрэва» трунаў хопіць». Хіба гэта адказ людзям, якія тут працуюць?».
Развітацца з Аляксандрам Хамлюком прыйшлі яго родныя і блізкія, сябры, знаёмыя, суседзі.
«Добры быў. Нічога дрэннага сказаць нельга. Як сем'янін, выдатны, так і на працы. Але нават ніхто з начальства не прыйшоў, каб сказаць добрае слова, хоць ён столькі гадоў аддаў гэтаму прадпрыемству», - кажа мясцовая жыхарка.
«Ён жа 27 гадоў адпрацаваў на адным месцы. Раней царскія катаржнікі працавалі на гэтым прадпрыемстве («Пінскдрэву» ў гэтым годзе 135 гадоў). І ўяўляеце, што і мой пляменнік працаваў на гэтай катарзе», - здзіўляецца цётка загінулага.
«Я як брат кажу. Трэба дасылаць камісіі не пасля таго, як у сем'ях гора. Перш чым дапусціць чалавека да працы, усё павінна быць даведзена да дасканаласці, каб праца чалавека была бяспечнай. Каб ён вяртаўся ў сваю сям'ю», - кажа брат загінулага.
Старэйшы брат кажа пра сваю адказнасць перад сіротамі, якіх пакінуў Аляксандр Хамлюк:
«У яго двое дзяцей. Яны яшчэ не сталі ў жыцці на свае ногі. Дачка - на другім курсе вучыцца. Сын - спартовец, нядаўна атрымаў траўму. Зноў жа праблемы. Трэба дапамагаць ім. Шмат праблемаў...».
