Польскія эксперты: Неэфектыўная эканоміка Лукашэнкі абрынецца
13- 30.11.2010, 9:03
Прычына цяперашніх праблемаў Беларусі – знаходжанне ва ўладзе Лукашэнкі, лічаць польскія эксперты.
У даследаванні «Беларусь страціла пакаленне», праведзеным польскім фондам «Форум грамадзянскага развіцця» (FOR), кажацца: працяглая адсутнасць рэформаў, адносна нізкія даходы хатніх гаспадарак і дэстабілізацыя нацыянальнай эканомікі з'яўляюцца галоўнымі праблемамі Беларусі, паведамляе БелаПАН са спасылкай на Польскае агенцтва друку.
Згодна з аналізам FOR, пасля сканчэння 20 гадоў з моманту распаду СССР паміж Беларуссю і Польшчай утварылася «эканамічная прорва»: беларуская сярэдняя зарплата ў тры разы ніжэй за польскую і на 30% менш, чым мінімальная зарплата ў Польшчы. Працягласць жыцця ў Беларусі на два гады карацей, чым у Польшчы.
Вынікі даследавання прадставіла грамадскасці 25 лістапада ў Варшаве супрацоўнік FOR Паўліна Хыліньска. Яна нагадала журналістам, што фонд быў створаны арганізатарам польскай эканамічнай рэформы Лешэкам Бальцэровічам у 2006 годзе. FOR займаецца асветніцкай працай у галіне эканомікі ў Польшчы, а таксама надае ўвагу эканамічным праблемам іншых краінаў.
Старшыня польскага Цэнтра сацыяльных і эканамічных даследаванняў Беларусі (CASE) Серж Наўдорскі падчас прэс-канферэнцыі адзначыў, што прычынай цяперашніх праблемаў у суседняй краіне з'яўляецца шматгадовая адсутнасць рэформаў. Ён патлумачыў, што ў канцы 1980-х гадоў тэмпы росту рэальнай зарабатнай платы ў Беларусі павялічваліся.
«Таму сацыялісты, якія прыйшлі да ўлады напачатку 1990-х, не бачылі прычынаў, каб штосьці змяняць, як гэта адбылося ў Польшчы пасля 1989 года, дзе эканоміка была рэфармаваная», — сказаў эксперт.
На думку Наўдорскага, яшчэ адной прычынай адсутнасці рэформаў стаў прыход да ўлады Аляксандра Лукашэнкі, бо пасля яго перамогі ўзраслі датацыі з боку Расеі.
«Такім чынам, беларуская эканоміка, сацыялістычная і неэфектыўная, не абрынулася. Паміж Расеяй і Беларуссю быў уведзены бяспошлінны гандаль, а такія прыродныя рэсурсы, як нафта і газ, прадаваліся Беларусі па заніжаных коштах», — адзначыў кіраўнік CASE.
Разам з тым, па словах Наўдорскага, расейскія датацыі ў хуткім часе знікнуць, бо Расея імкнецца ўступіць у Сусветную гандлёвую арганізацыю, што патрабуе ўвядзення рынкавых коштаў на ўсе тавары і паслугі.
