Справу апазіцыянера Сяргея Каваленкі вядзе ўжо трэці следчы

Упраўленне папярэдняга расследавання УУС Віцебскага аблвыканкама выклікала на допыт рэдактара сайта «Народныя навіны Віцебска» Сяргея Серабро.

Як высветлілася, справу віцебскага актывіста Сяргея Каваленкі, які 7 студзеня вывесіў бел-чырвона-белы сцяг на галоўнай гарадской ёлцы Віцебска, перадалі новаму следчаму, Андрэю Баранаву, - ужо трэцяму пасля следчых-жанчынаў Таццяны Турлаевай і Аксаны Муравіцкай, перадае «Радыё Свабода».

Баранаў распытваў журналіста, наколькі даўно і як добра яны з Сяргеем Каваленкам знаёмыя, і ці не ведаў Сяргей Серабро загадзя пра запланаваную акцыю са сцягам. Таксама следчы распытваў пра падрабязнасці фатаграфавання падзеяў на плошчы Перамогі ў Віцебску, дзе на ёлцы з'явіўся сцяг.

Нагадаем, што ў Сяргея Серабро, які фатаграфаваў вывешванне сцяга, а потым тое, як яго здымалі супрацоўнікі МНС, міліцыянты перапісалі асабістыя дадзеныя. 13 студзеня быў праведзены ператрус у кватэры, якую здымаюць Серабро і яго жонка. У прысутнасці гаспадыні кватэры былі канфіскаваныя два кампутары і фотаапарат, якія належалі журналісту. Пра незаконнасць гэтых дзеянняў была пададзеная скарга ў пракуратуру, і 27 студзеня аргтэхніку вярнулі.

Нагадаем, што 7 студзеня на галоўнай ёлцы горада з'явіўся бел-чырвона-белы сцяг. За гэта быў затрыманы 34-гадовы актывіст Кансерватыўна-Хрысціянскай партыі БНФ Сяргей Каваленка. Пастановай пракурора Віцебска 10 студзеня апазіцыянер быў змешчаны ў СІЗА на два месяцы. У дачыненні да яго ўзбуджаная справа па артыкуле 339, частка 2 КК (хуліганства, здзейсненае паўторна, альбо групай асобаў, альбо звязанае з супрацівам асобе, якая спыняе хуліганскія дзеянні, альбо спалучанае з прычыненнем менш цяжкага цялеснага пашкоджання). 12 студзеня апазіцыянер быў вызвалены пад падпіску аб невыяздзе.

Пасля гэтага ў Віцебску пачаліся арышты і ператрусы ў дамах апазіцыянераў.