Аўтуховіч узнагароджаны медалём Каліноўскага «за асабістую мужнасць»
3- 16.04.2010, 9:51
Камітэт па ўшанаванні Менскага гарадскога культурна-асветніцкага клуба «Спадчына» ўзнагародзіў Мікалая Аўтуховіча медалём Кастуся Каліноўскага.
Пра гэта 15 красавіка ў Менску на ўручэнні ўзнагароды паведаміў БелаПАН старшыня аргкамітэта па стварэнні руху салідарнасці «Разам» Вячаслаў Сіўчык.
Паводле яго словаў, у адказ на зварот лідэраў палітычных партыяў і грамадскіх арганізацыяў камітэт па ўшанаванні 25 сакавіка ўзнагародзіў Аўтуховіча медалём Каліноўскага «за самаадданасць, асабістую мужнасць і ахвярнасць, шляхетныя паводзіны падчас судовага працэсу» з уручэннем дыплома і занесеннем у кнігу гонару «рупліўцы твае, Беларусь».
Сіўчык уручыў дыплом і медаль адвакату Аўтуховіча Паўлу Сапелку і заклікаў усіх праваабаронцаў і людзей добрай волі падтрымаць прадпрымальніка і яго сяброў сваёй прысутнасцю на судовым працэсе.
Ад імя падабароннага Сапелка выказаў падзяку за ўзнагароду і ўдзячнасць тым, хто больш за год праяўляе неабыякавасць да справы Аўтуховіча, не забывае пра яго лёс і падтрымлівае падабароннага ў любой форме.
