Беларусам раяць не выходзіць на вуліцы ў дождж

У сувязі з праходжаннем над тэрыторыяй Беларусі воблака вулканічнага пылу, медыкі рэкамендуюць не знаходзіцца на вуліцы падчас дажджу.

«Частка вулканічнага пылу будзе з ападкамі выпадаць на зямлю, таму мы рэкамендуем у найбліжэйшыя суткі абмежаваць знаходжанне на адкрытым паветры падчас дажджу і не выкарыстоўваць дажджавую ваду ў гаспадарчых мэтах», - паведамілі агенцтву «Інтэрфакс» у панядзелак у міністэрстве аховы здароўя Беларусі.

«Па дадзеных Рэспубліканскага цэнтра радыяцыйнага кантролю і маніторынгу навакольнага асяроддзя, вулканічнае воблака праходзіць над Беларуссю прыкладна на адлегласці 6 км ад зямлі», - удакладнілі ў міністэрстве.

«Існуюць групы людзей з падвышанай адчувальнасцю, чыё здароўе саслабленае спадарожнымі захворваннямі. Гэтыя людзі могуць адчуваць недамаганне, звязанае з уздзеяннем атмасферных забруджвальнікаў пры іх канцэнтрацыі», - патлумачылі медыкі.

Як раней паведамляла агенцтва са спасылкай на Інстытут фізікі НАН Беларусі, у найбліжэйшы аўторак воблака вулканічнага пылу над Беларуссю павялічыцца.