Еўракамісія: Уступленне Украіны ў Мытны саюз пацягне наступствы

Еўрапейская камісія патлумачыла Украіне немагчымасць адначасовага ўступлення ў Мытны саюз і стварэнне зоны свабоднага гандлю з ЕЗ.

Як перадае УНІАН, пра гэта 7 красавіка паведаміў намеснік генеральнага дырэктара Генеральнага дырэктарата «Еўрапейская палітыка суседства» Еўракамісіі Х'юг Мінгарэлі, выступаючы на паседжанні Камітэта па пытаннях замежных спраў Еўрапарламента.

«Калі Украіна павінна будзе далучыцца да гэтага Мытнага саюза, стане надзвычай складана для гэтай краіны сфармаваць зону свабоднага гандлю з ЕЗ. Паколькі фармаванне Мытнага саюза будзе азначаць, што Украіна далучыцца да агульных знешніх тарыфаў з трымя краінамі, гандаль якіх з ЕЗ вельмі мала лібералізаваны. І, баюся, мы апынемся ў тупіку», - сказаў ён.

«З нашага боку, мы абсалютна шчырыя з украінскай уладай адносна наступстваў, да якіх гэта прывядзе», - дадаў прадстаўнік Еўракамісіі.

Разам з тым ён дапусціў, што краіны, якія хочуць бачыць Украіну сябрам Мытнага саюза, разумеюць магчымыя наступствы такога кроку для Кіева.

«Тыя, хто аказвае ціск, каб Украіна далучылася да Мытнага саюзу, выдатна ведаюць, якімі будуць наступствы», - сказаў Х. Мінгарэлі.