Сямашка: «На жаль, «Мотавела» спынілася»
45- 9.04.2010, 16:00
Першы віцэ-прэм'ер Беларусі Уладзімір Сямашка канстатаваў няўдалы факт прыватызацыі ААТ «Мотавела».
Пра гэта Уладзімір Сямашка заявіў, выступаючы 8 красавіка на паседжанні Нацыянальнага савета па працоўных і сацыяльных пытаннях, паведамляе TUT.BY.
«На жаль, «Мотавела» спынілася. І цяпер трэба думаць, што будзе далей з гэтым прадпрыемствам, дзе з 5 тыс. работнікаў засталіся 1280, ёсць праблемы па выплаце зарабатнай платы, пазыкі па энергетыцы. А яшчэ два гады таму інвестар, які прыйшоў на гэтае прадпрыемства, быў паспяховым», - цытуе словы першага віцэ-прэм'ера прэс-служба ўрада.
Нагадаем, што аўстрыйская кампанія ATEC у 2007 годзе купіла «Мотавела». Аднак летам мінулага года прайшлі паведамленні, што ATEC адчувае фінансавыя цяжкасці па інвеставанні ў беларускі завод. Мяркуючы па ўсім, праблема да гэтага часу не вырашылася.
