Беларускія дыпламаты збеглі з Бішкека

У беларускім Міністэрстве замежных спраў заяўляюць, што дыпламаты пакінулі Кыргызстан «выключна з меркаванняў бяспекі».

Усе беларускія дыпламаты, акрэдытаваныя ў Кыргызстане, пакінулі сталіцу гэтай краіны «выключна з меркаванняў бяспекі», паведаміў «Інтэрфаксу» прэс-сакратар МЗС Беларусі Андрэй Савіных.

Па яго словах, Надзвычайны і Паўнамоцны амбасадар Беларусі ў Кыргызстане Віктар Дзенісенка «адкліканы для кансультацый у Менск, а супрацоўнікі нашай амбасады адкамандзіраваныя ў беларускую сталіцу ў распараджэнне МЗС краіны». Дыпламат адзначыў, што ад’езд беларускіх дыпламатаў з Кыргызстана «з'яўляецца часовай мерай, якая звязана, паўтараю, выключна з фізічнай пагрозай жыцця і здароўя нашых дыпламатаў у Бішкеку». Па яго словах, «пагроза зыходзіць ад экстрэмісцкіх элементаў, якія знаходзяцца па-за якога-небудзь кантролем».

Савіных заявіў, што беларускія дыпламаты «вернуцца да выканання сваіх службовых абавязкаў у Кыргызстане адразу ж, як толькі там нармалізуецца абстаноўка». «Падкрэсліваю: гэта рашэнне не звязана ні з якімі іншымі фактарамі, акрамя меркаванняў бяспекі», - сказаў прэс-сакратар МЗС.

Як раней паведамляў сайт charter97.org, Курманбек Бакіеў знаходзіцца ў Беларусі з 19 красавіка. Рашэнне аб прадастаўленні яму палітычнага прытулку прыняў асабіста Аляксандр Лукашэнка. Гэта выклікала пратэсты з боку грамадзян Кыргызстана, а таксама сваякоў загінуўшых дэманстрантаў, страляць па якіх аддаў загад Бакіеў. Каля амбасады Беларусі ў Бішкеку пастаянна праходзяць пікеты. Новыя ўлады Кыргызстана патрабуюць экстрадаваць Бакіева на радзіму, аднак беларускія ўлады адмаўляюцца.