Вучэнні КСАР АДКБ пройдуць у кастрычніку ў Расеі
1- 21.05.2010, 9:24
Вучэнні Калектыўных сілаў аператыўнага рэагавання Арганізацыі дамовы аб калектыўнай бяспецы пройдуць з 25 па 28 кастрычніка на тэрыторыі Расеі.
Месцам іх правядзення стане Чэбаркульскі палігон у Чалябінскай вобласці, паведамілі БелТА ў прэс-службе штаба Прыволжска-Уральскай ваеннай акругі.
Адпаведны пратакол аб правядзенні сумесных аператыўна-тактычных вучэнняў КСАР АДКБ падпісалі сёння на сустрэчы ў Чалябінскай вобласці прадстаўнікі Беларусі, Расеі, Казахстана, Кыргызтана, Арменіі і Таджыкістана, а таксама аб'яднанага штаба АДКБ.
Папярэднічаць вучэнням будуць сумесныя трэніроўкі. Заяўленая тэма вучэнняў - «Антытэрарыстычная тэхніка». Плануецца адпрацаваць пытанні супрацьдзеяння тэрарыстычным захопам, а таксама дзеянні ва ўмовах лакальнага ўзброенага канфлікту.
Усяго ў вучэннях плануецца задзейнічаць каля 2 тыс. вайскоўцаў, больш за 30 самалётаў і верталётаў, 300 адзінак ваеннай тэхнікі. У вучэннях будуць прымаць таксама ўдзел супрацоўнікі МНС і ўнутраныя войскі.
