Лідзія Аўтуховіч: «Майго сына выратаваў толькі Бог ...»

Маці палітвязня Мікалая Аўтуховіча пра прысуд яе сыну даведалася ад журналістаў.

Як паведамляе «Радыё Свабода», сама Лідзія Аўтуховіч на суд паехаць не магла, бо, з яе слоў, у зале суда ў яе папросту могло не вытрымаць сэрца.

- Я ведаю, што і такі прысуд для яго вялікі, паколькі ён ні ў чым не вінаваты, - кажа Лідзія Аўтуховіч. - Я хацела б, каб яго наогул вызвалілі, ён і так нацярпеўся: колькі ён галадаў, колькі з яго здзекаваліся, колькі ён мучыўся. Там яго ніхто не падтрымліваў, толькі чакалі яго смерці, але Бог выратаваў яго ад смерці, таму што ён ні ў чым не вінаваты. Ён нават нарадзіўся на Ражаство Хрыстова, яму ўсё было дадзена ад Бога. Ён ніколі не пакрыўдзіў чалавека, усім дапамагаў, хто толькі да яго не звяртаўся і нікому не адмаўляў, а яго за гэта так вымучылі ... Столькі ён бедны выцярпеў, столькі здароўя аддаў. Але мы ўсе пад Богам. І дзякуй Богу, што хоць ён жывы і здаровы.

- А як вы, як ваш стан?

(Плача)

- А як я? Кожны дзень плачу, колькі я ўжо нацярпелася, колькі я ўжо отмучалась, колькі начэй не спала, не было такой хвіліны, каб я не плакала. Я плачу, што яго катуюць ні за што, ён пакутуе ні за што, а ворагі яго чакаюць толькі смерці. Толькі Бог дапамог яму прайсці такое цяжкае выпрабаванне.

Лідзіі Аўтуховіч у гэтым годзе спаўняецца 71 год, цяпер яна жыве адна.

Нагадаем, што арыштаваны ў лютым 2009 года Мікалай Аўтуховіч асуджаны да 5 гадоў і 2 месяцаў пазбаўлення волі ў калоніі строгага рэжыму, Уладзімір Асіпенка - да 3 гадоў калоніі агульнага рэжыму.

З абвінавачваных былі знятыя шэраг абвінавачванняў - у падрыхтоўцы тэракту супраць былога старшыні Гродзенскага аблвыканкама Уладзіміра Саўчанкі, у замаху на былога намесніка міністра па падатках і зборах Васіля Камянко. Даказана толькі назіранне з мэтай пошуку кампрамату. Суд прызнаў, што палітвязні не рабілі грамадска небяспечныя дзеянні. Знятыя таксама абвінавачванні з нагоды падпалу дома экс-начальніка Ваўкавыскага РУУС Сяргея Кацубы ў 2004 годзе.