ААЦ хоча «максімальна хуткі і вельмі танны» інтэрнэт (Відэа)
31- 18.06.2010, 9:09
Дэкларуецца, што хуткасць доступу ў сетку Інтэрнэт у Беларусі «у бліжэйшай будучыні павялічыцца ў 10 разоў».
Упэўненасць у гэтым на прэс-канферэнцыі выказаў начальнік Аператыўна-аналітычнага цэнтра пры Прэзідэнце Беларусі Валерый Вакульчык, перадае Electroname.com са спасылкай на БелТА.
«Паводле ўказання кіраўніка дзяржавы вядзем перамовы з вядучымі сусветнымі фірмамі для ўкаранення ў нас найноўшых тэхналогіяў у сферы інтэрнэту. Мы разлічваем разоў у 10, а то і больш, павелічыць хуткасць. Гэта, вы ведаеце, будзе і відэаінфармацыя, і дазволіць атрымаць доступ для найноўшых тэхналогіяў, якія грунтуюцца на інтэрнэце», заявіў у інтэрв'ю тэлеканалу АНТ начальнік ААЦ.
Валерый Вакульчык таксама адзначыў, што дзейнасць Аператыўна-аналітычнага цэнтра пры Прэзідэнце Беларусі накіраваная на тое, каб прыцягнуць у краіну новыя тэхналогіі і стварыць роўныя ўмовы для дзяржаўных і прыватных інтэрнэт-правайдэраў. «Мы вядзем дыялог з інтэрнэт-правайдэрамі, каб разам абмяркоўваць пытанні развіцця нацыянальнага сегмента сеткі Інтэрнэт», - сказаў ён. У прыватнасці ААЦ падтрымаў ініцыятыву асацыяцыі «Белінфакам» па стварэнні ў Беларусі незалежнага рэгулятара ў сферы інфармацыйных тэхналогіяў.
