Рынак нерухомасці ў Менску абрынуўся?

Рынак жылой нерухомасці перажывае катастрофу - кошты падаюць на фоне рэзкага зніжэння колькасці пагадненняў.

Ёмістасць рынку, па травеньскіх паказчыках, скарацілася, у параўнанні з сакавіком гэтага года, практычна ўдвая. Нават падчас вясновай панікі 2009 года сітуацыя была больш абнадзейлівая, піша партал interfax.by

Другая палова 2009 года для рынку жылой нерухомасці Менска прайшла пад знакам стабільнасці: паводле дадзеных Нацыянальнага кадастравага агенцтва, у сталіцы штомесяц здзяйснялася ад 900 да 1 100 пагадненняў, а сярэдняя - НКА карыстаецца так званым коштам сярэдняга значэння - медыянай (медыя - лічба, які з'яўляецца сярэдзінай мноства лічбаў - ІФ) - кошт «квадрата» нават рос, дасягнуўшы да канца года адзнакі ў $1 336.

Пачатак 2010 года выпаў не самым удалым - усяго 485 пагадненняў, ды і сярэдні кошт квадратнага метра крыху знізіўся. Аднак такая сітуацыя была і ў дастаткова «паспяховым» студзені 2008-га, і ў студзені 2009-га, калі за месяц і зусім было здзейсненае 331 пагадненне. Тым больш што ў лютым - сакавіку сітуацыя выраўнялася: 619 і 720 пагадненняў адпаведна, а сярэдні кошт «квадрата» узрос са студзеньскіх $1 311 да $1 352. Ёмістасць рынку сталічнай нерухомасці дасягнула $913 млн.

Абвал пачаўся ў красавіку. У параўнанні з сакавіком, колькасць пагадненняў скарацілася амаль на 18%, а «квадрат» за месяц патаннеў на $40 - да $1 314, бо ў папярэднія гады прадаўцы і пакупнікі нерухомасці нязменна былі больш актыўныя ў красавіку, чым у сакавіку!

Катастрофа працягнулася ў траўні, які стаў сапраўды «чорным» для прадаўцоў. Усяго 391 пагадненне - у 2 з лішнім разы менш, чым у траўні мінулага года! Пры гэтым кошт упаў ніжэй за адзнаку ў $ 1 300 - да $1 286 за квадратны метр. Ёмістасць рынку, у выніку, знізілася, паводле дадзеных Нацыянальнага кадастравага агенцтва, да $468 млн.

У цэлым, за пяць месяцаў 2010 года было здзейснена 2 807 пагадненняў з нерухомасцю. Для параўнання: у мінулым годзе за гэты ж перыяд было куплена-прададзена 3478 кватэраў, у 2008-м - 3 333, у 2007-м - 4 193.

Аб насычэнні рынку казаць не прыходзіцца - чарга тых, хто мае патрэбу ў паляпшэнні жыллёвых умоваў распісаная не на адну пяцігодку наперад. Можна выказаць меркаванне, што ў красавіку - траўні і, бадай, у чэрвені, фармуецца адкладзены попыт - патэнцыйныя пакупнікі, якія маюць неабходныя фінансавыя рэсурсы для набыцця нерухомасці, занялі пазіцыю назіральніка, чакаючы яшчэ больш нізкіх коштаў.

Аднак гэта адносіцца да невялікай часткі патэнцыйных пакупнікоў. Большасць ж не можа набыць нерухомасць з-за адсутнасці ўласных сродкаў. Пазыковыя ж грошы зараз з'яўляюцца вельмі дарагімі (гаворка ідзе пра банкаўскія крэдыты). Акрамя таго, далёка не кожны можа ўзяць крэдыт у неабходным аб'ёме з-за невысокіх даходаў.

Безумоўна, галоўным каталізатарам актыўнасці на рынку жылой нерухомасці Менска могуць стаць менавіта банкі - пры ўмове зніжэння працэнтных ставак за карыстанне крэдытамі. Аднак наўрад ці можна чакаць, што фінансавыя структуры пачнуць займацца дабрачыннасцю.

Можна выказаць меркаванне, што на гэтым фоне ўсе большыя праблемы пачнуць адчуваць кампаніі-забудоўшчыкі і будаўнічыя арганізацыі: іх прыбытак скароціцца больш значна. Не выключана, што некаторым давядзецца сысці з рынку.