Падпісаны ўказ аб акцыянаванні «Беларуськалія»

Аляксандр Лукашэнка падпісаў указ N331, у адпаведнасці з якім «Беларуськалій» у 2010 годзе будзе пераўтвораны ў адкрытае акцыянернае таварыства.

Пра гэта паведамілі агенцтву Інтэрфакс у прэс-службе кіраўніка.

Таксама, у адпаведнасці з гэтым указам, у ААТ у 2010 годзе павінны быць ператвораныя беларускія магістральныя нафтаправоды - РУП «Гомельтранснафта Дружба» і РУП Наваполацкае рэспубліканскае ўнітарнае прадпрыемства па транспарце нафты «Дружба».

У прэамбуле дакумента сказана, што ўказ прыняты «ў мэтах прыцягнення інвестыцый у развіццё асобных арганізацый».

У адпаведнасці з указам, пры рэфармаванні гэтых дзяржпрадпрыемстваў іх акцыі не падлягаюць продажу членам працоўнага калектыву і абмену на найменныя прыватызацыйныя чэкі «Маёмасць».

«Раней урад дэталёва разгледзеў пытанні перспектыўнага развіцця гэтых прадпрыемстваў і прызнаў мэтазгодным гэты крок. Такое пераўтварэнне створыць умовы для прыцягнення айчынных і замежных інвестараў, зацікаўленых у доўгатэрміновых эканамічных сувязях, гатовых узяць на сябе абавязацельствы па выкананні сацыяльных умоў, тэхнічным пераабсталяванні і павышэнні канкурэнтаздольнасці прадпрыемстваў, а таксама прывядзе да памяншэння выдаткаў рэспубліканскага бюджэту на кіраванне дзяржаўнай маёмасцю», - адзначыў прадстаўнік прэс-службы.

ПА «Беларуськалій» з'яўляецца адзіным вытворцам хлоркалію ў Беларусі, а таксама адным з найбуйнейшых пастаўшчыкоў калійных угнаенняў на сусветны рынак. Доля прадпрыемства ў сусветнай вытворчасці калійных угнаенняў складае каля 15%, у сусветным экспарце калію - звыш 16%.

Раней вытворчасць калійных угнаенняў заканадаўча была выведзена з пераліку аб'ектаў, якія знаходзяцца ў выключнай уласнасці дзяржавы. Фонд дзяржмаёмасці Беларусі заявіў аб падрыхтоўцы ўсіх неабходных дакументаў да акцыянавання Беларуськалія.

Першы віцэ-прэм'ер урада Беларусі Уладзімір Сямашка паведамляў пра перамовы з некалькімі інвестарамі аб продажы мінарытарнай долі Беларуськалія.