Байнэт губляе ананімнасць

Кампанія «Белтэлекам» апублікавала новыя ўмовы абслугоўвання інтэрнэт-карыстальнікаў у сэрвісных пунктах.

З 1 ліпеня ўсе жадаючыя працаваць у інтэрнэце павінны будуць прад'яўляць адміністратару свае пашпарты. Акрамя гэтага, пацвярджаць сваю асобу прыйдзецца і тым юзэра, якія захочуць далучыцца да інтэрнэту па сетцы Wi-Fi. Пачынаючы з чацвярга, карты Wi-Fi будуць прадавацца пасля прад'яўлення пашпарта, паведамляюць «Беларускія навіны».

У апавяшчэнні «Белтэлекама» кажацца, што з 1 ліпеня паслугі па доступе ў інтэрнэт будуць падавацца наведнікам сэрвісных пунктаў пасля ўнясення запісу аб асабістых дадзеных карыстальнікаў.

У журнал уліку будуць уносіць прозвішча, імя, імя па бацьку карыстальніка, від і нумар дакумента, які засведчвае асобу, найменне органа яго выдаў. Да ліку дакументаў, якія засведваюць асобу, аднесеныя: пашпарт, ваенны білет, вадзіцельскае пасведчанне, пенсіённае пасведчанне, студэнцкі білет, пашпарт марака.

Дэ-факта, з 1 ліпеня ўсе законныя спосабы падключэння да інтэрнэту будуць азначаць, што асоба карыстальніка можа быць вызначаная. У тым выпадку, калі выхад у інтэрнэт будзе ажыццяўляцца праз ADSL-мадэм, асоба абанента будзе вызначаная дзякуючы ідэнтыфікацыі абаненцкай прылады. Выхад у інтэрнэт праз мабільны тэлефон дазволіць вылічыць карыстальніка па базе дадзеных сотавага аператара.

Нарэшце, тэхналогія Wi-Fi, якая да апошняга часу забяспечвала ананімную прысутнасць у Сеціве, цяпер перастане быць такой. Паводле новых правілаў, якія ўступаюць у сілу з 1 ліпеня, продаж картак Wi-Fi будзе ажыццяўляцца пасля прад'яўлення пашпарта.

Указ № 60 абавязвае правайдэраў Беларусі захоўваць персанальныя дадзеныя аб прысутнасці карыстальнікаў у інтэрнэце на працягу аднаго года. У гэты перыяд упаўнаважаныя дзяржорганы змогуць запытаць у правайдэраў інфармацыю аб трафіку абанентаў, якія яго цікавяць.

Інтэрнэт-правайдэры пацвердзілі «Беларускім навінам», што да цяперашняга часу падрыхтавалі тэхналагічную базу для ідэнтыфікацыі і захоўвання дадзеных аб карыстальніках. Сродкі для забеспячэння аператыўна-вышуковых мерапрыемстваў (САВМ) правайдэры набылі, выконваючы патрабаванні ўказу № 60.

Зараз, фактычна, у дзяржавы ёсць усе магчымасці, каб атрымаць інфармацыю пра трафік інтэрнэт-карыстальнікаў. Як патлумачылі «Беларускім навінам» інтэрнэт-правайдэры, для атрымання такой інфармацыі упаўнаважаным дзяржорганам дастаткова будзе падрыхтаваць запыт і прывесці фармальнае абгрунтаванне для атрымання дадзеных.

Навошта патрэбная інфармацыя пра Інтэрнэт-карыстальнікаў дзяржаве? Лукашэнка падчас прэс-канферэнцыі ў снежні 2009 года заявіў, што такія дадзеныя дзяржаве неабходныя для выканання санітарных функцыяў у інтэрнэце.

«Мы зробім так, каб чалавек, які нясе ўвесь гэты бруд, адказваў па законе. А забараняць мы нічога не маем намеру. Таму, што датычыць інтэрнэту, парадак будзе наведзены. Забароны доступу нікому не будзе, але адказнасць будзе, так, як у Амерыцы», - падкрэсліў Аляксандр Лукашэнка.

Незалежныя эксперты мяркуюць, што неабходнасць кантраляваць інтэрнэт у дзяржавы з'явілася перш за ўсё ў сувязі з прэзідэнцкімі выбарамі.

«Уся гэтая кампанія па кантролі за інтэрнэтам распачынаецца менавіта сёння з вядомай прычыны - наперадзе прэзідэнцкія выбары. Напярэдадні выбараў, не выключана, асобныя інфармацыйныя рэсурсы будуць блакавацца. Прэцэдэнты такія ўжо былі. Пры гэтым ёсць падставы меркаваць, што ў гэтую прэзідэнцкую кампанію інтэрнэт-рэсурсы будуць блакавацца часцей, чым раней», - мяркуе медыяэксперт Алесь Анціпенка.

Намеснік старшыні Беларускай асацыяцыі журналістаў, юрыст Андрэй Бастунец таксама лічыць, што цяперашнія спробы рэгулявання інтэрнэту звязаныя з палітычнымі прычынамі.

«Дзяржава робіць усё для таго, каб узмацніць кантроль за інтэрнэтам, які з'яўляецца не толькі сродкам інфармацыі, але і камунікацыі», - кажа Андрэй Бастунец. Эксперт прагназуе, што дзяржава будзе выкарыстоўваць ідэнтыфікацыю інтэрнэт-карыстальнікаў для нанясення кропкавых удараў па палітычных апанентах.

Алесь Анціпенка лічыць, што кампанія па ідэнтыфікацыі асобы інтэрнэтчыкаў закліканая пасеяць страх у галовах карыстальнікаў. «Гэта спроба псіхалагічнага ціску на інтэрнэт-карыстальнікаў», - лічыць медыяэксперт. Разам з тым, эксперты «Беларускіх навінаў» мяркуюць, што ідэнтыфікацыя абаненцкіх прыладаў спародзіць зваротную паслугу - сэрвісы, якія дазваляюць інтэрнэтчыкам працаваць у Сеціве ананімна і мець доступ да абсалютна ўсіх рэсурсаў.

«Ва ўмовах прэзідэнцкай кампаніі попыт на альтэрнатыўную інфармацыю будзе ўзрастаць, што выкліча адпаведную прапанову», - прагназуе Алесь Анціпенка.