Хопіць трываць дыктатуру ў Беларусі!

1.07.2010, 11:34

Сусветна вядомыя дзеячы культуры Вялікабрытаніі заклікалі прэм'ер-міністра звярнуць увагу на сітуацыю ў Беларусі.

Тэкст адкрытага ліста падаем цалкам:

Прэм'ер-міністру, дэпутату Дэвіду Камерану

Лондан

Даўнінг-стрыт, 10

SW1A 2AA

1 ліпеня 2010 года

Паважаны Дэвід Камеран,

ХОПІЦЬ ТРЫВАЦЬ ДЫКТАТУРУ!

Мы - група брытанскіх акцёраў, якія працуюць у тэатры. Мы глыбока занепакоеныя цэнзурай і парушэннямі правоў чалавека ў Беларусі.

Мы пішам у той дзень, калі прэзідэнт Лукашэнка прымае указ, які ўводзіць цэнзуру ў Інтэрнэце. Ён сцвярджае, што гэта спроба "абараніць правы беларускіх грамадзянаў, грамадства і дзяржавы ў інфармацыйнай сферы". Аднак мы лічым, што гэта прывядзе да далейшых пераследванняў асобных людзей і групаў асобаў, якія хацелі б прапанаваць беларускім грамадзянам альтэрнатыўныя пункты гледжання. Мы лічым, што справа толькі ва ўрадзе, які адчуў пагрозу сваёй уладзе і імкнецца прыціснуць апазіцыю.

У такіх краінах як Фінляндыя і Эстонія пастанавілі, што доступ у Інтэрнет з'яўляецца важным складнікам правоў чалавека, як для грамадзянаў, так і для міжнародных арганізацыяў. ААН таксама настойвае на сусветным доступе да сеткі. Увядзенне абмежаванняў на выкарыстанне Інтэрнэту з'яўляецца наўмыснай спробай абмежаваць доступ беларускіх грамадзянаў да абмеркавання і выказвання альтэрнатыўных пунктаў гледжання, што з'яўляецца жыццёва неабходнай часткай любога здаровага грамадства. Мы павінны супрацьстаяць гэтаму рашэнню, як рашэнню, якое робіць замах на свабоду і накіраванае супраць чалавека.

Мы заклікаем Вас выкарыстоўваць усе свае сілы і ўвесь свой уплыў, каб забяспечыць справядлівыя прэзідэнцкія выбары, якія неўзабаве павінны прайсці ў Беларусі. Выбары, якія адбыліся ў 2001 годзе, былі прызнаныя міжнароднымі назіральнікамі несвабоднымі. Пасля выбараў 2006 года Арганізацыя ААН па бяспецы і супрацоўніцтве ў Еўропе (АБСЕ) заявіла, што выбары не адпавядалі іх абавязальніцтвам па правядзенні дэмакратычных выбараў і, што Лукашэнка "дазволіў дзяржаўным органам улады не даваць магчымасці грамадзянам свабодна і справядліва выказаць сваю волю на выбарчых участках. .. напрыклад пры дапамозе запалохвання і ўціску незалежных галасоў ... гэта было відавочна на працягу ўсёй перадвыбарчай кампаніі ".

Сённяшні указ, безумоўна, зніжае верагоднасць таго, што выбары, якія маюць адбыцца, будуць больш дэмакратычнымі і справядлівымі, чым папярэднія.

Напэўна, гэтым разам ужо не будзе відавочных забойстваў на вуліцах, аднак яшчэ зусім нядаўна здзяйсняліся шматлікія палітычна матываваныя выкраданні і забойствы людзей, у тым ліку, такіх як Юры Захаранка (экс-міністр унутраных справаў) і Віктар Ганчар (віцэ-спікер парламента і экс -кіраўнік выбарчай камісіі). І гэта ўсяго толькі пачатак спісу. Што неабходна зрабіць для таго, каб наш урад распачаў дзеянні?

Дзякуем Вам за удзеленую пільную ўвагу гэтаму пытанню.

З павагай,

Сэр Том Стопард, драматург, рэжысёр, кінасцэнарыст, крытык

Марк Равенхіл, драматург, рэжысёр, пісьменнік

Сэмюэль Уэст, акцёр і рэжысёр

Кэрыл Чэрчыль, сцэнарыст

Алан Рыкман, тэатральны і кінаакцёр

Генры Гудман, акцёр

Говард Брэнтан, драматург

Сайман Стывенс, драматург

Сайман МакБэрні, акцёр, прадзюсер, сцэнарыст

Генры Портэр, пісьменнік, журналіст