Літва абураная, што беларускія ўлады ігнаруюць яе пратэсты па АЭС

Пазіцыя Літвы адносна будаўніцтва беларускай АЭС не змянілася.

Пра гэта заявіў БелаПАН кіраўнік камісіі па ядзернай энергетыцы сейма Літвы Рокас Жылінскас.

«Пазіцыя Літвы не змянілася ў выніку кансультацый з Беларуссю, бо беларускі бок пакінуў без адказаў нашыя пытанні, у прыватнасці, аб крытэрах выбару Астравецкай пляцоўкі для размяшчэння АЭС», - растлумачыў літоўскі парламентар.

Літва пярэчыць супраць размяшчэння будучай беларускай АЭС менавіта на Астравецкай пляцоўцы - каля літоўскай тэрыторыі і менш чым у 50 кіламетрах ад Вільні.

Рокас Жылінскас назваў беларуска-літоўскія кансультацыі на гэты конт «чыстай фармальнасцю, якую Беларусь хоча выкарыстаць, каб паказаць, не надаючы значэння іх вынікам і зместу, што яна выконвае працэдуры Канвенцыі Эспаа».(Канвенцыя Эспаа - Канвенцыя ЕЭК ААН аб ацэнцы ўздзеяння на навакольнае асяроддзе ў транспамежным кантэксце. - БелаПАН.).

«Пасля чэрвеньскіх кансультацый Літва не змяніла сваёй пазіцыі па беларускай АЭС. Акрамя таго, Літва ўжо накіравала сваю афіцыйную ацэнку гэтых кансультацый і запрасіла Беларусь аб дадатковай інфармацыі», - паведаміў кіраўнік парламенцкай камісіі.

Афіцыйны ліст на імя намесніка міністра прыродных рэсурсаў і навакольнага асяроддзя Беларусі Віталя Куліка накіраваны 9 ліпеня. У ім намеснік міністра навакольнага асяроддзя Літвы Аляксандрас Спруогіс просіць аб правядзенні ў Літве паўторных грамадскіх слуханняў па справаздачы аб ацэнцы ўздзеяння на навакольнае асяроддзе (АУНА) будучай АЭС, а таксама аб новай двухбаковай сустрэчы для працягу кансультацый у межах Канвенцыі Эспаа.