Дзяржкантроль праверыў патэнцыйных пераможцаў «Дажынак»
6- 17.09.2010, 13:20
Прадпрыемствам, якія заявілі сваіх кандыдатаў, прыйшлося даказваць факт працоўнага гераізму сваіх супрацоўнікаў.
У Віцебскай вобласці Камітэт дзяржаўнага кантролю Беларусі праверыў дакладнасць дадзеных, падрыхтаваных да рэспубліканскага фестывалю-кірмаша «Дажынкі-2010» для вызначэння пераможцаў. Прадпрыемствам, якія заявілі сваіх кандыдатаў, прыйшлося даказваць факт працоўнага гераізму сваіх супрацоўнікаў.
Разам з КДК праверку праводзіла кантрольна-рэвізійнае ўпраўленне камітэта па сельскай гаспадарцы і харчаванні Віцебскага аблвыканкама. У выніку, спісы кандыдатаў на перамогу былі змененыя, так як не ўсе прадпрыемствы прайшлі праверку на сумленнасць і прыстойнасць, піша «Тэлеграф» са спасылкай на газету «Рэспубліка».
Так, старшы эканаміст КУСГП «Чашніцкае» Чашніцкага раёна завысіла намалот аднаго з хлебаробаў. Аналагічную сітуацыю выявілі ў СПК «Сіцькава» Міёрскага раёна.
Таксама з конкурсу знялі камбайнера СВК «Мішневічы» Шумілінскага раёна. Паводле справаздачы, механізатар нарыхтаваў 21,6 тоны травяных кармоў. Аднак, кіраўніцтва гаспадаркі ўтаіла ад арганізатараў рэспубліканскага конкурсу той факт, што ў гэтым годзе камбайнер прыцягваўся да дысцыплінарнай адказнасці.
