Дэвід Крамер: Мы павінныя перастаць яму верыць!

У нямецкім фондзе імя Маршала ў амерыканскай сталіцы ў чацвер адбылася дыскусія, прысвечаная палітычным наступствам прэзідэнцкіх выбараў у Беларусі.

Нагадаем, што пасля жорсткага разгону дэманстрантаў 19 снежня ў Менску, якія заклікалі беларускія ўлады перагледзець вынікі прэзідэнцкіх выбараў, у турмах беларускага КДБ апынулася каля 700 чалавек. Большасць з затрыманых ужо адпушчаная на волю, аднак ім яшчэ прыйдзецца выплаціць штрафы за ўдзел у несанкцыянаваным мітынгу. Як паведамляе праваабарончы цэнтр "Вясна", на пятае студзеня ўжо прад'яўленыя абвінавачванні 25 ўдзельнікам таго мітынгу.

Іх абвінавачваюць па двух частках артыкула 293 ("Масавыя беспарадкі”) Крымінальнага кодэкса Рэспублікі Беларусь. Артыкул 293 КК РБ прадугледжвае пакаранне ад 3 да 15 гадоў пазбаўлення волі. З дваццаці пяці чалавек, якім прад'яўленыя абвінавачванні, 23 ўтрымліваюцца пад вартай, 2 пад падпіскай аб нявыездзе; яшчэ 8 у статусе падазраваных, з іх 4 пад вартай, 3 пад падпіскай аб невыяздзе і адзін знаходзіцца за межамі краіны, паведамляе незалежны беларускі інтэрнэт-рэсурс "Хартыя-97”. Сярод арыштаваных - чатыры кандыдаты ў прэзідэнты, а таксама іхнія давераныя асобы па перадвыбарнай кампаніі, дэмакратычныя актывісты і журналісты.

Мэтай круглага стала, арганізаванага нямецкім фондам імя Маршала, было жаданне выступоўцаў падрабязна і з першых вуснаў расказаць сусветнай грамадскасці аб гэтых «вязнях сумлення», перадае "Голас Амерыкі".

У дыскусіі прынялі ўдзел: Дэвід Крамер - былы намеснік памочніка дзяржсакратара па пытаннях Еўропы і Еўразіі, а цяпер дырэктар арганізацыі Freedom House, Наталля Каляда - дырэктар «Свабоднага тэатра» Беларусі, а таксама Ірына Красоўская - заснавальніца і прэзідэнт фонду «Мы памятаем ... ». Муж Ірыны Красоўскай - Анатоль - бясследна знік разам са сваім сябрам віцэ-спікерам беларускага парламента Віктарам Ганчаром у 1999 годзе. Еўрапейскія эксперты выказваюць здагадкі, што абодва апазіцыянера сталі ахвярамі палітычна матываваных выкраданняў, арганізаваных рэжымам дзеючага прэзідэнта Беларусі.

"Сапраўдны твар” Лукашэнкі

Каляда і Красоўская прымалі ўдзел у мірнай дэманстрацыі 19 снежня. Шмат каго з іхніх блізкіх сяброў затрымалі; некаторым з затрыманых потым прад'явілі абвінавачанне ў арганізацыі масавых беспарадкаў. Была затрыманая і сама Каляда, аднак ўлады пад ціскам грамадскасці адпусцілі яе на працягу 24 гадзін.

Яны падзяліліся асабістымі ўражаннямі ад перажытага на беларускай Плошчы, а таксама распавялі пра рэпрэсіі уладаў, якія пайшлі за прэзідэнцкімі выбарамі 19 снежня.

Беларускія грамадзянскія актывісткі спрабавалі прыцягнуць увагу публікі, якая прыйшла на сустрэчу, да тых людзей, якія ўсё яшчэ знаходзяцца ў засценках СІЗА беларускага КДБ.

«Усё тое, што зараз адбываецца з арыштаванымі, адбываецца па адной прычыне: Лукашэнка хоча цалкам знішчыць беларускую апазіцыю», - заявіла Ірына Красоўская.

«Што тычыцца Андрэя Саннікава, якога Лукашэнка разглядаў, як галоўнага апазыцыйнага кандыдата, то ўсе тыя дзеянні, якія былі распачатыя супраць яго, даказваюць, што кіраўнік дзяржавы зводзіць з ім асабістыя рахункі. Арыштаваная жонка Саннікава - Ірына Халіп, якая напісала мноства крытычных артыкулаў пра Лукашэнку, - яшчэ адно таму пацвярджэнне », - заключае яна.

Кіраўнік амерыканскага Freedom House Дэвід Крамер таксама не саромеўся рэзкіх словаў у адрас рэжыму беларускага прэзідэнта. Ён вельмі жорстка раскрытыкаваў еўрапейскія ўрады, якія напярэдадні выбараў «фліртавалі» з Лукашэнкам, спадзяючыся, што ён упершыню адважыцца правесці дэмакратычныя выбары.

«Мы павінныя перастаць яму верыць! Ён майстар страўлівання Захаду з Расеяй. І ў гэтых гульнях ён стала выходзіць пераможцам. Дэмакратычна абраныя ўрады павінныя нарэшце ўбачыць ягоны сапраўдны твар. Я, напрыклад, да гэтага часу не магу зразумець, чаму прэзыдэнт Грузіі Міхаіл Саакашвілі адным з першых адправіў Лукашэнку віншаванне з перамогай на выбарах. Гэта ж было так бязглузда з ягонага боку!»- Заявіў Крамер.

Усе гэтыя эмацыйныя заявы былі адрасаваныя прадстаўнікам дыпламатычных місій у Вашынгтоне, грамадзянскім актывістам, акадэмікам, дырэктарам буйных НДА і журналістам, якія прыйшлі ў нямецкі фонд імя Маршала.

Пасьля дыскусіі Ірына Красоўская і Наталля Каляда накіраваліся на асабістую аўдыенцыю да Дзяржсакратара ЗША Хілары Клінтан, якая раней звярталася з заклікам да беларускіх уладаў аб неабходнасці вызваліць палітычных зняволеных.