Арыштаваны былы палітвязень Аляксандр Малчанаў

Міліцыянты затрымалі Малчанава ўначы 27 кастрычніка. Раніцай дзяжурны барысаўскай міліцыі паведаміў маці Аляксандра, што яго вязуць у суд.

Маці Малчанава Галіна, кажа, што сын прыехаў дадому прыкладна а палове на другую ночы, і калі ён паркаваў машыну ў двары, да яго пад'ехалі тры міліцэйскія машыны. Падчас затрымання хлопца павалілі на зямлю. У доме прайшоў ператрус. Канфіскаваны кампутар, паведамляе «Радыё Свабода».

Маці ўсю ноч тэлефанавала ў міліцыю, хацела даведацца пра сына. Дзяжурны міліцыянт над ёй смяяўся, не даваў інфармацыі.

Аляксандр Малчанаў за ўдзел у падзеях 19 снежня 2010 года быў асуджаны на 3 гады пазбаўлення волі ў калоніі ўзмоцненага рэжыму. Адбываў пакаранне ў Магілёве. 14 верасня вызвалены згодна з указам Лукашэнкі аб памілаванні.