Да Народнага сходу гатовыя

Віктар Івашкевіч, адзін з арганізатараў, адзначае, што з падрыхтоўкай да Народнага сходу «ўсё ідзе нармальна».

Нагадаем, акцыя пройдзе 8 кастрычніка (субота), у 13.00 амаль у 30 гарадах краіны.

Інфармацыя ў значнай ступені ўжо распаўсюджаная. Цяпер ініцыятары накіроўваюць запрашэнні прыняць удзел у сходзе прадстаўнікам улады, каб «яны выступілі перад людзьмі». Адказаў, праўда, пакуль не было. Толькі ў Магілёве галоўны ідэолаг папярэдзіў, каб гэта сапраўды быў сход, а не мітынг, паведамляе «Наша Ніва».

Аднак Івашкевіч не выключае, што ўлады будуць «паскудзіць». Па ягонай інфармацыі, «улады не атрымалі канкрэтных указанняў адносна сваіх паводзінаў».

Па словах Івашкевіча, пры падрыхтоўцы да Народнага сходу на яго арганізатараў не было нейкага надзвычайнага ціску. Ён называе толькі інцыдэнт са збіццём ў менскім офісе Беларускага прафсаюза працаўнікоў РЭП (аднаго з арганізатараў сходу), але асобныя рэпрэсіі ўжо адчулі на сабе валанцёры і рэгіёнах.

У той жа час, па інфармацыі Івашкевіча, на прадпрыемствах ідэалагічныя працаўнікі палохаюць людзей тым, што на сходах будзе весціся відэаздымка.

Адсутнасць масавых рэпрэсій Віктар звязвае з тым, што арганізатары абралі такую ​​форму сходу, якой цяжка супрацьстаяць.

У Менску Народны сход пройдзе ў парку Дружбы народаў на плошчы Бангалор у 13.00. Ніякіх агульных шэсцяў не плануецца. З месцамі правядзення Сходу ў іншых 28 гарадах можна азнаёміцца ​​тут. Сярод галоўных патрабаванняў: спыненне росту коштаў, павышэнне заробкаў і пенсій, рассакрэчванне прэзідэнцкага фонду.