Беларусаў, якія здаюць жыллё, будуць «раскулачваць»

Падатак за здачу жылля ў наём прапануецца сур'ёзна павялічыць.

Вакол прапановы на пасяджэнні Савета міністраў у аўторак разгарнулася дыскусія. З аднаго боку, падатак можа апынуцца дадатковай цяжкасцю для арандатараў, сярод якіх нямала прадстаўнікоў не самых багатых катэгорый насельніцтва, маладых сем'яў, студэнтаў. З іншага - уладальнікі кватэр, якія здаюць сваё жыллё ў арэнду, атрымліваюць прыстойны прыбытак, прычым часта ў валюце, і ім цалкам па сілах падзяліцца з бюджэтам, піша TUT.by.

Па Менску прапанаваная сума падатку складае ад 75 тысяч да 300 тысяч рублёў на месяц за кожны здаваны жылы пакой. У Брэсце за пакой на месяц прапануецца заплаціць падатак у памеры ад 30 да 150 тысяч, у Віцебску - ад 45 тысяч рублёў.

Удзельнікі пасяджэння засумняваліся ў абгрунтаванасці новых ставак, выказаўшы здагадку, што неабходнасць плаціць за здачу ў арэнду трохпакаёвай кватэры падатак у памеры да 900 тысяч рублёў можа загнаць гэты бізнэс у цень.

«На мой погляд, гэты бізнес і так увесь у цені», - парыраваў міністр фінансаў Андрэй Харкавец. Ён прызнаў, што тэма далікатная, і намацаць баланс вельмі складана, паабяцаўшы папрацаваць над дадатковым абгрунтаваннем павелічэння падатку.

Старшыня Менгарвыканкама Мікалай Ладуцька прапанову Мінфіна падтрымаў, адзначыўшы, што кошт арэнды кватэры ў Менску дасягае 1000 даляраў на месяц (уладкаваная кватэра з мэбляй ў цэнтральнай частцы горада плошчай да 100 кв м). «900 тысяч рублёў падатку - гэта 100 даляраў. Сёння таксама градацыя ёсць, і калі прывязвацца да курсу даляра, то фактычна для большасці ўладальнікаў жылля гэта тыя ж выдаткі», - дадаў Ладуцька, растлумачыўшы, што максімальная стаўка будзе распаўсюджвацца на невялікую колькасць дарагіх кватэр у цэнтры. Па ягоных словах, падатак за пакой у шэраговай кватэры ў панэльным доме будзе каля 100 тыс рублёў (супраць 35 тысяч у цяперашнім годзе), што ў даляравым эквіваленце не вышэй за ўзровень пачатку года.

Яму нагадалі, што заробкі і стыпендыі ў Беларусі выплачваюцца не ў далярах. Падобна да таго, дыскусія будзе працягнутая.

Цяпер у адпаведнасці з арт. 173 Асаблівай часткі Падатковага кодэкса стаўкі падатку вызначаюцца таксама за кожны пакой у кватэры. Памер фiксаваных сум падатку з фізічных асоб у межах падатковых ставак, вызначаных прэзідэнтам, усталёўваецца мясцовымі ўладамі ў залежнасці ад катэгорыі населенага пункта. У Менску стаўка падаходнага падатку за здачу пакоя складае адну базавую велічыню (35 тысяч рублёў). Пры гэтым у Менску ў залежнасці ад размяшчэння кватэры да фіксаваных сумах падаходнага падатку ўсталяваныя павышаючыя каэфіцыенты 1,5 і 2.