Лукашэнка даручыў Мартынаву «прывесці за руку» верхаводаў бізнесу

Беларускі дыктатар раздаў ураду чарговыя «геніяльныя» даручэнні.

Аляксандр Лукашэнка чакае ад працы міністэрства замежных спраў пошуку сур'ёзных замежных інвестараў і заклікае пры дыверсіфікацыі экспартных рынкаў не забывацца на традыцыйных партнёраў Беларусі, перадае «Інтэрфакс-Захад».

«Вашая задача - сталы пошук сур'ёзных уплывовых верхаводаў бізнесу сусветнага ўзроўню з шырокімі кантактамі і вагой ва ўрадавых колах», - заявіў ён у пятніцу ў Менску на нарадзе з новым складам урада, кажучы аб задачах МЗС.

«Вы літаральна за руку павінныя весці іх сюды. Бо нам ёсць што прапанаваць», - падкрэсліў дыктатар, звяртаючыся да кіраўніка МЗС Беларусі Сяргея Мартынава.

Лукашэнка паставіў задачу пашырэння прысутнасці Беларусі на сусветным рынку і правядзення актыўнай знешнеэканамічнай палітыкі. «Сёння ў нас ёсць добрыя, але, на жаль, нешматлікія прыклады асваення новых рынкаў. Па-сапраўднаму магутнае ўзаемадзеянне склалася з Венесуэлай і Кітаем, аднак гэтага мала», - падкрэсліў ён.

«Бо мы распаўсюдзілі сваю дыпламатычную прысутнасць на вялікую палову свету. Цяпер трэба замацоўвацца і ў эканамічнай сферы, знаходзіць новыя рынкі для нашай прадукцыі», - працягнуў ён. «Прычым гэтая праца павінная праводзіцца не на шкоду ўжо правераным традыцыйным гандлёва-эканамічным партнёрам. Любыя перакосы тут недапушчальныя», - падкрэсліў ён.

«Пагрузіўшыся у фарміраванне Мытнага саюза і Адзінай эканамічнай прасторы (з Расеяй, Казахстанам - ІФ), мы некалькі выпусцілі з віду Саюзную дзяржаву. Але ж у гэтым інтэграцыйным аб'яднанні напрацаваны унікальны запас ідэй, досведу, эканамічных і тэхналагічных сувязяў, карыснасць і перспектыўнасць якіх бясспрэчная», - заўважыў Лукашэнка.

«Эканамічны эфект ад прамога супрацоўніцтва з расейскімі рэгіёнамі папросту зацемніць любыя гандлёвыя абароты з далёкім замежжам», - сказаў ён.

«У пагоні за атрыманнем ўяўных палітычных дывідэндаў мы своечасова не падцягнулі да сур'ёзнага ўзроўню гандлёва-эканамічныя сувязі», - заўважыў дыктатар, кажучы аб адносінах з Еўразвязам.

Дыктатар лічыць важнай задачай міністэрства замежных спраў і міністэрства прамысловасці ўваходжанне экспартаарыентаваных беларускіх прадпрыемстваў у перадавыя замежныя транснацыянальныя структуры для прыцягнення новых тэхналогій і актывізацыі збыту.