Стэфан Эрыксан: «Сітуацыя дзіўная, нават дзікая атрымліваецца»

Амбасадар Швецыі ў Беларусі і вялікі прыхільнік беларускай музыкі Стэфан Эрыксан выказаўся з нагоды забаронаў канцэртаў айчынных выканаўцаў.

“Сітуацыя нейкая дзіўная, нават дзікая атрымліваецца. Самыя таленавітыя і цікавыя беларускія артысты не могуць выступаць у сваёй краіне! Мне нават цяжка растлумачыць шведамі, што такое магчыма!", - заявіў ён у інтэрв'ю сайту «Тузін гітоў».

Дыпламат Стэфан Эрыксан прыехаў у Мінск шэсць год таму, каб узначаліць аддзяленне шведскай амбасады ў Беларусі. Адразу паставіў сабе мэту вывучыць беларускую мову, і такім чынам стаў цікавіцца беларускай сучаснай музыкай. Кажа, што спачатку яму было незразумела, ці існуе ўвогуле музыка на беларускай мове. Потым даведаўся, што яна ёсць. У цяперашні час амбасадар, які ў кароткі тэрмін выдатна авалодаў беларускай мовай, не прапускае ў Менску ні аднаго буйнога канцэрту і сам спрыяе арганізацыі канцэртаў. Шмат у чым дзякуючы яму, напрыклад, гурт NRM выступіў у Каралеўскім тэатры ў Стакгольме, Drum Ecstasy далі сумесны канцэрт у Менску з шведскім выканаўцам фры-джаза Дрорам Файлером. Стэфан лічыць, што беларускія музыкі ствараюць вельмі шчырую, моцную і таленавітую музыку, якая заслугоўвае значна больш увагі, чым большасць з таго, што паказваюць па беларускім тэлебачанні. І заўсёды выказвае ўпэўненасць у тым, што калі-небудзь гэтая музыка будзе годна ацэненая.

17 сакавіка Стэфан Эрыксан збіраўся пайсці на канцэрт «Крамбамбулі» у паб-клуб "Госці". «Для мяне падобныя мерапрыемствы заўсёды вялікае свята і я засмуціўся, калі даведаўся, што зноў па нейкіх надуманых прычынах забаранілі выступ аднаго з самых яркіх музычных гуртоў. На жаль, гэта не першы падобны выпадак за апошні час. Сітуацыя нейкая дзіўная, нават дзікая атрымліваецца. Самыя таленавітыя і цікавыя беларускія артысты не могуць выступаць у сваёй краіне! Мне нават цяжка растлумачыць шведамі, што такое магчыма! Гэтыя людзі павінныя быць гонарам краіны! Хоць да канца не хочацца верыць, што сапраўды нейкі чорны спіс існуе... Мабыць, нехта недзе хоча перастрахавацца... Перакананы, што тыя беларускія музыканты і артысты, якія ствараюць нешта вартае, усё роўна данясуць сваю творчасць да публікі. Веру, што ў Беларусі знойдуцца людзі, якія гатовыя сумленна дамагацца справядлівасці, каб беларусы змаглі ўжывую пазнаёміцца ​​са сваімі героямі», - заўважыў Стэфан Эрыксан.

Тым часам, апынулася пад пытаннем правядзенне канцэрту гурта «Ляпіс Трубяцкой» у Менску 1 і 2 красавіка. Усе квіткі на абодва выступы раскуплены, але ягоныя арганізатары не могуць пакуль з упэўненасцю сказаць, што мерапрыемства адбудзецца. А толькі што стала вядома, што канцэрт "Ляпісаў" у Магілёве 20 сакавіка адменены.