«Пётр Пятровіч адчувае сябе нармальна, усміхаецца»

Учора, 14 красавіка, старшыню Нацбанка Беларусі Пятра Пракаповіча перавялі з рэанімацыі ў асобную палату.

Учора ж Пётр Пятровіч пасля складанай аперацыі на сэрцы зрабіў першыя крокі па палаце, паведамляе "Народная воля".

Старшыня Нацбанка Беларусі зараз знаходзіцца ў РНПЦ "Кардыялогія".

"Так, гэта праўда, што ў нас ляжыць Пётр Пракаповіч, - пацвердзіў 13 красавіка інфармацыю "Народнай Волі" дырэктар Рэспубліканскага навукова-практычнага цэнтра "Кардыялогія", акадэмік Аляксандр Мрочак. - Яму замянілі клапан. Але ўсё прайшло добра..."

14 красавіка бліжэй да вечара намеснік дырэктара па хірургічнай дапамозе, доктар медыцынскіх навук, прафесар Вячаслаў Янушка пракаментаваў "Народнай Волі" стан Пракаповіча так: "Адчувае сябе нармальна, усміхаецца".

Па словах Вячаслава Янушка, "гэта была звычайная, планавая аперацыя".

"Мы з такімі выпадкамі маем справу практычна кожны дзень, - адзначае Вячаслаў Аляксеевіч. - Таму нічога экстраардынарнага або выходзячага за межы пратакола звычайнай аперацыі не было. Клапан ў яго на самой справе быў у дрэнным стане...".

На вуліцу старшыня Нацбанка пакуль не выходзіць. Толькі ўчора ён упершыню стаў на ногі пасля аперацыі.

Як кажуць лекары РНПЦ "Кардыялогія", на наступным тыдні будзе вырашацца пытанне аб пераводзе Пятра Пракаповіча на рэабілітацыю ў Аксакаўшчыну.