Праваабаронца затрымалі па падазрэнні ў дачыненні да тэракту
8- 19.04.2011, 19:15
Віцебскі праваабаронца, актывіст грамадзянскай кампаніі «Наш дом» Павел Левінаў затрыманы па падазрэнні ў дачыненні да выбуху ў Менску.
Ён быў адным з удзельнікаў святкавання дня нараджэння праваабаронца Валера Шчукіна. 19 красавіка ў РУУС Фрунзенскага раёна Менска былі дастаўленыя 18 чалавек.
Як паведаміў БелаПАН актывіст кампаніі «Наш дом» Андрэй Аксёнаў, праваабаронцы і актывісты кампаніі з Баранавічаў, Гомеля, Магілёва, Слуцку і Віцебска сабраліся ў Менску, каб адсвяткаваць дзень нараджэння калегі Валера Шчукіна. Мерапрыемства праходзіла на кватэры дачкі праваабаронца. «Раптам у кватэру распачалі спробы ўварвацца міліцыянты, але ім не адчынілі дзверы. Тады яны выклікалі з працы дачку Шчукіна і патрапілі ў кватэру. Перапісалі ва ўсіх пашпартныя дадзеныя і сышлі. Потым міліцыянты прыйшлі ў другі раз. Усе, хто знаходзіўся там, былі затрыманыя і дастаўленыя ў міліцыю. Самога Шчукіна забралі босага, ён не паспеў абуцца», - адзначыў Аксёнаў.
Па ягоных словах, у РУУС усе затрыманыя былі апытаныя, у некаторых узялі адбіткі пальцаў, у прыватнасці ў Ларысы Шукайла з Магілёва. «У нас цікавіліся, з якой мэтай мы прыехалі ў Менск, дзе ночылі, па якой нагоды сабраліся. Думаю, затрыманне адбылося ў святле апошніх сумных падзей у метро. Міліцыя паказвае, што праца вядзецца», - лічыць Аксёнаў.
З РУУС было адпушчана 17 чалавек. На трох складзеныя пратаколы за дробнае хуліганства (артыкул 17.1 КаАП). Левінаў затрыманы па артыкуле Крымінальнага кодэксу «Тэрарыстычны акт» і падазраецца ў датычнасці да падрыхтоўкі выбуху ў метро, паведаміў БелаПАН Валер Шчукін.
«Гэта быў «хапун» без усялякіх тлумачэнняў, нас ні ў чым не абвінавачвалі, не складалі пратаколаў. Міліцыя стварае бачнасць працы па пошуку тэрарыстаў, хоча паказаць, што ўсё пад кантролем, больш за два не збірацца, - сказаў Шчукін. - Мне апранулі кайданкі, калі я папрасіў звяртацца на «вы», сказалі, што падпаляць бараду. Я адмовіўся адказваць на ўсе пытанні без свайго законнага прадстаўніка. Каб сфатаграфаваць, мяне трымалі тры чалавекі».
