Віцебск паставілі "на вушы" з-за тэракту

Правяраюць навучальныя ўстановы, дзе вучыліся выхадцы з Віцебска - меркаваныя арганізатары тэракту ў менскім метро, ​​а таксама прадпрыемствы, дзе яны працавалі.

Вынікі праверак - звальненні і вымовы, паведамляе "Праваабарончая хроніка".

Маштабная праверка чакаецца ў сярэдняй школе № 35, дзе вучыліся двое затрыманых.

- Будуць правяраць, як вядзецца выхаваўчая праца, як справы з ідэалогіяй. І усё роўна, што тыя затрыманыя скончылі школу амаль 10 гадоў таму, - правераць і мінулае, і сучаснасць. І не толькі ў той школе, дзе яны вучыліся, а ва ўсіх. Прычым у нас, як правіла, задача праверак - не пацвердзіць, што ўсё добра, а давесці, што ўсё робіцца дрэнна, і некага абавязкова пакараць, - скардзіцца настаўніца адной з віцебскіх школ.

Са звестак у Інтэрнэце вынікае, што па крайняй меры двое з затрыманых хлопцаў атрымалі ў свой час сярэднюю спецыяльную адукацыю. Праверку установаў прафтэхадукацыі праводзіла пракуратура, і ўжо вядомыя вынікі: узровень прафілактыкі правапарушэнняў прызнаны нізкім. Удзельнікі праверкі звярнулі ўвагу на рост злачыннасці сярод падлеткаў - яны здзяйсняюць крадзяжы і рабаванні, іх неаднаразова затрымліваюць у нецвярозым стане, зафіксаваныя асацыяльныя паводзіны ў сем'ях.

Правяраюць і прадпрыемствы, дзе працавалі затрыманыя - Віцебскі завод трактарных дэталяў. Падрабязнасці гэтай праверкі чамусьці не агучваюцца, таму па горадзе ходзяць розныя чуткі - што на заводзе ў нейкай шафе знайшлі "кавалак выбухоўкі", што звольнілі ўсю адміністрацыю.

Пакуль афіцыйнай інфармацыі пра затрыманых і іхнюю датычнасці да тэракту ў СМІ няма, Віцебск поўніцца разнастайнымі чуткамі, якія трапляюць у тым ліку і да журналістаў, правакуючы ўсё новыя сенсацыі ў прэсе і Інтэрнэце. Ва ўстановах і арганізацыях горада праводзяцца прафілактычныя гутаркі з супрацоўнікамі - каб не размаўлялі на "ўсялякія слізкія тэмы" са староннімі і не дзяліліся звесткамі пра затрыманых "выхадцаў з Віцебска" з прадстаўнікамі сродкаў масавай інфармацыі.