Умовы атрымання 1 млрд даляраў крэдыту - тайна

Беларусь узгадніла ўмовы і падыходы атрымання крэдыту з Антыкрызіснага фонду ЕўрАзЭС

Пра гэта паведаміў журналістам прэм'ер-міністр Міхаіл Мясніковіч па выніках пасяджэння Савета кіраўнікоў урадаў СНД у Менску 19 мая, перадае БелаПАН.

«Пытанне даўно прапрацоўваецца, ёсць дамоўленасці, якія замацаваныя ў адпаведнай матрыцы, - што мы павінныя рабіць, каб эфектыўна распарадзіцца пазыковымі сродкамі», - сказаў Мясніковіч.

Ён падкрэсліў, што асноўныя грошы знаходзяцца ва ўнутранай эканоміцы і ніякія крэдыты не могуць вырашыць гэтае пытанне.

Разглядаючы магчымасць атрымання крэдыту з Антыкрызіснага фонду ЕўрАзЭС, Беларусь ставіць на мэце хуткае вырашэнне назапашаных праблемащ і ў далейшым - зарабіць па сцэнары, які б забяспечваў збалансаваную работу эканомікі, заявіў прэм'ер-міністр.

Па ягоных словах, будзе вырашацца пытанне аб прадастаўленні Беларусі трох ці, можа быць, трох з паловай мільярдаў даляраў на працягу трох гадоў.

Што тычыцца умоваў, то яны - макраэканамічныя, сказаў Мясніковіч. Рэсурсы, па ягоных словах, будуць прадастаўленыя не на бязвыплатнай аснове - пад стаўку, ніжэй за камерцыйную.