Працоўная група ПА АБСЕ распрацавала рэзалюцыю па Беларусі

Галоўнае патрабаванне дакумента - вызваленне палітвязняў.

Працоўная група па Беларусі Парламенцкай асамблеі АБСЕ распрацавала рэзалюцыю па сітуацыі ў краіне для галасавання на штогадовай сесіі асамблеі ў Бялградзе.

14 чэрвеня ў Капенгагене прайшла сустрэча прадстаўнікоў працоўнай групы ПА АБСЕ з мэтай выпрацаваць агульны падыход да садзейнічання правам чалавека і вяршэнству закона ў Беларусі. Пра гэта паведамляе прэс-служба ПА АБСЕ. У сустрэчы пад старшынствам кіраўніка рабочай групы па Беларусі ПА АБСЭ Уты Цапф ўдзельнічалі італьянскі, польскі і літоўскі парламентарыі Клаўдыё Д'Аміка, Павел Панцілюш і Вілія Алекнайтэ-Абрамікене, перадае БелаПАН.

Цапф заклікала беларускія ўлады «неадкладна вызваліць палітычных вязняў». «Працягваючы трымаць у турме апазіцыйных дзеячаў і адмаўляючыся выдаваць візы міжнародным экспертам і абаронцам правоў чалавека, Менск зноў і зноў паказвае, што аддае перавагу аўтарытарнай ізаляцыі дэмакратычнага дыялогу. Мы спадзяемся, што ўлады зменяць курс», - сказала яна.

Цапф прапанавала для абмеркавання на сесіі ПА АБСЕ, якая пачнецца ў Бялградзе 6 ліпеня, рэзалюцыю, накіраваную на «аднаўленне дыялогу» з Менскам. Рэзалюцыя заклікае Беларусь вызваліць палітычных зняволеных, затрыманых у сувязі з дэманстрацыямі ў снежні 2010 года; дазволіць палітычным зняволеным кансультавацца з юрыстамі, сустракацца з сем'ямі, атрымліваць медыцынскую дапамогу; дазволіць ўезд у краіну незалежным экспертам, прызначаным ў межах Маскоўскага механізму; развіваць заканадаўства ў сферы СМІ ў адпаведнасці з міжнароднымі абавязальніцтвамі краіны.

Калі рэзалюцыя будзе прынятая на галасаванні ПА АБСЕ, то яна ўвойдзе ў белградскую дэкларацыю асамблеі, закліканую вызначыць далейшую палітыку арганізацыі.

Апроч правоў чалавека ўдзельнікі капенгагенскай сустрэчы абмеркавалі пытанні экалогіі. «Народы Літвы і Беларусі маюць рацыю, калі непакояцца з нагоды паспеху, з якой Менск прасоўваецца да будаўніцтва АЭС на мяжы паміж нашымі краінамі», - сказала Алекнайтэ-Абрамікене.

«Не чакаючы вынікаў ацэнкі ўплыву на навакольнае асяроддзе і ігнаруючы свае прававыя абавязацельствы адносна кансультацый з Літвой па планаванай АЭС, Беларусь падвяргае людзей усяго рэгіёну вялікай небяспекі», - заявіла яна.