У Менску праезд падаражэе да 1500?

Па сабекошце адна паездка ў сталічным грамадскім транспарце абыходзіцца ў 3000 рублёў, заяўляюць чыноўнікі.

Брэсцкія транспартнікі ўслед за гомельскімі калегамі заявілі, што эканамічная сітуацыя аўтобусных паркаў вобласці і Беларусі ў цэлым патрабуе змены тарыфу ў бок павелічэння.

Паводле разлікаў, выйсці на ўзровень студзеня 2011 года дапаможа кошт аднаго талона не менш за 1250 рублёў. Тым не менш пасля нарады ў Брэсцкім аблвыканкаме спыніліся на 1200, піша «Народная воля».

- Мы прааналізавалі сітуацыю, - распавёў газеце «Вячэрні Брэст» намеснік начальніка ўпраўлення антыманапольнай і коштавай палітыкі Брэсцкага аблвыканкама Канстанцін Рэчыц. - У выніку накіраваны зварот транспартных арганізацый у Савет міністраў з просьбай даць згоду транспартнікам павысіць тарыф да ўзроўню 1200 рублёў за талон. У прынцыпе, усе вобласці называюць прыкладна такую ​​лічбу. Урад павінен разгледзець нашыя прапановы і зацвердзіць ці не зацвердзіць павышэнне тарыфаў.

Тым часам, у Менгарвыканкаме яшчэ ў красавіку, то бок, да дэвальвацыі і падаражэння бензіну, заяўлялі, што па сабекошце адна паездка ў сталічным грамадскім транспарце абыходзіцца ў 3000 рублёў і прапаноўвалі, каб грамадзяне аплочвалі як мінімум 30%, а то і ўсе 50%.

Нагадаем, што Аляксандр Лукашэнка нядаўна забараніў коштам расці і заявіў, што больш нічога ў краіне не патрабуе перагляду коштаў у бок павелічэння. Цікава, каго супакойваў прэзідэнт - сябе ці нас?