Грэф хоча быць карысным Лукашэнку

Ашчадны банк Расеі накіраваў 480 млн даляраў у Беларусь праз свой філіял і хоча быць карысным Лукашэнку «ў гэты перыяд часу».

«Мы бачым, што пры наяўнасці збалансаванай палітыкі, да канца бягучага года сітуацыю ў Беларусі можна не толькі стабілізаваць, але і істотна палепшыць», - адзначыў Г. Грэф на сустрэчы ў аўторак у Менску з Аляксандрам Лукашэнкам.

Як адзначыў Г. Грэф, з пачатку года Ашчадны банк накіраваў «дадатковую ліквіднасць на падтрыманне нашага банка (БПС) прыкладна на $ 480 млн.» «Думаю, што гэта дапамагло падтрымаць ўстойлівасць нашага банка. Думаю, што мы таксама ў гэты перыяд часу дапамаглі шматлікім прадпрыемствам у Беларусі - у энергетыцы, у прамысловасці, у сельскай гаспадарцы», - сказаў Г. Грэф.

«Я падрыхтаваўся да сустрэчы, па тым, чым бы мы маглі быць вам карысныя ў гэты перыяд часу», - заявіў старшыня праўлення Ашчаднага банка РФ.

Лукашэнка падзякаваў кіраўніцтву Ашчаднага банка Расеі за тое, што «ў канцы мінулага года, на працягу гэтага года, калі ў нас узніклі пэўныя праблемы, вы, як і абяцалі, вашае падпаддзяленне ў Беларусі вельмі прыстойна сябе паводзіць». «Вы аказваеце падтрымку нашаму рэальнаму сектару з набыццём па імпарце. Гэта дарагога каштуе, і я гэта вельмі цаню», - адзначыў А. Лукашэнка.

«Я вельмі рады, што ў свой час лёс гэтага банка (БПС) мы звязалі з Ашчадным банкам Расеі, і маем сёння адпаведную падтрымку», - сказаў кіраўнік.

А. Лукашэнка заявіў, што ў ходзе сустрэчы хацеў бы абмеркаваць з Г. Грэфам шэраг праблемаў. «Так і вы маўчаць не будзеце, падкажаце тое, што вы бачыце з боку, што нам трэба рабіць у гэтай сітуацыі. Для нас гэта вельмі важна», - адзначыў Лукашэнка.

Нагадаем, кіраўніцтва Ашчаднага банка Расеі неаднаразова выказвала жаданне паўдзельнічаць у распродажы беларускай уласнасці, у прыватнасці, у крэдытаванні пакупкі «Беларуськалія».