Лонгіна Камалоўскага не пусцілі ў Беларусь

Старшыню грамадскага аб’яднання «Вспульнота польска» не пусцілі ў Беларусь.

Лонгін Камалоўскі ехаў на урачыстасці, прымеркаваныя да ўгодкаў акцыі Арміі краёвай «Вострая брама», паведамляе радыё «Рацыя».

Урачыстасці ладзіць Саюз палякаў у Беларусі. Перад мяжой у Кузніцы-Беластоцкай палітык сеў у машыну віцэ-старшыні Саюза палякаў у Беларусі Мечыслава Яскевіча:

– Беларускі памежнік забраў нашы пашпарты і знік з імі на нейкае паўгадзіны. Пасля паўгадзіны прыйшоў начальнік змены ў званні капітана і сказаў, што спадар Лонгін Камалоўскі не можа ўехаць на тэрыторыю Беларусі. Ён запытаў, чаму, у мяне ж дыпламатычны пашпарт, на якіх асновах... Яны сказалі, што на аснове нейкага там артыкула Камалоўскі часова не можа ўехаць у Беларусь, калі ж у яго ёсць прэтэнзіі, дык можа звярнуцца ў беларускую амбасаду на тэрыторыі Рэспублікі Польшча.

Мерапрыемствы да ўгодкаў акцыі Арміі краёвай адбываюцца на працягу двух дзён на Гродзеншчыне. У іх прымаюць удзел як сябры апальнага Саюза палякаў, так і прадстаўнікі польскага консульства ў Гродне на чале з генеральным консулам Анджэем Хадкевічам.