1 000 000 беларусаў могуць застацца без працы

Гэта можа здарыцца ўжо ўвосень.

Мільён беларусаў застануцца без працы, калі не вырашыцца праблема выхаду на адзіны валютны курс і не будзе вольнага доступу да валютнага рынку ўсіх суб'ектаў гаспадарання. Такое меркаванне ў сваёй публікацыі, размешчанай на партале справавой інфармацыі BEL.BIZ, выказаў галоўны рэдактар ​​часопіса «Валютное регулирование и ВЭД» Уладзімір Арцюгін.

Як адзначае эксперт, для эканомікі Беларусі, дзе значная частка ВУП завязаная на знешнім гандлі, асноўнай праблемай у працы ўсіх суб'ектаў гаспадарання (як дзяржаўных, так і недзяржаўных) з'яўляецца адсутнасць рэальнага курсу.

«У сувязі з гэтым маючы $ 2 млрд ці тое за калійную соль, ці тео за 35% акцый «Беларуськалія» можна разглядаць як забеспячэнне для адкрыцця валютнага рынку. Сюды яшчэ можна дадаць і $ 300 млн, атрыманыя ад Азербайджана», - піша Арцюгін.

Па ягоных словах, $ 2 млрд - гэта праца «Беларуськалія» на працягу 8 месяцаў.

«Наўрад ці Беларусь будзе гатовая такі перыяд не атрымліваць валюту ад продажу калійнай солі, таму, хутчэй за ўсё, гэта завуаліраваны продаж 35% акцый, - робіць выснову эксперт. - Як следства, можна будзе разлічваць на атрыманне наступнага траншу ў $ 0,44 млрд ад ЕўрАзЭС. Потым да канца года будзе прададзеная астатняя частка «Белтрансгазу», а там будзе падпісаная і новая дамова з МВФ. Калі ўсё будзе ўдала, то вернуць грошы па крэдыце, а акцыі «Беларуськалія» застануцца ў дзяржавы. Калі не, то ўсё роўна трэба будзе яго прадаваць. Нездарма і «Беларуськалію», і «Белтрасгазу» адмянілі ільготы па абавязковым продажы валютнай выручкі».

Як адзначае Арцюгін, зацягваць з лібералізацыяй валютнага рынку небяспечна, «бо вырашаць усе пытанні ў ручным рэжыме складана, ды і інвестараў гэта адпуджвае, а ўсё рабіць за крэдытныя грошы дорага».

«Чакаецца, што да восені многія камерцыйныя прадпрыемствы могуць наогул спыніць сваю працу. А ў гэтым сектары задзейнічана каля 1 000 000 чалавек. На парозе зіма, і не заўважаць праблем такой колькасці людзей складана», - напісаў эксперт.

Пры гэтым аналітык мяркуе, што пры выраўноўванні курсу падымуцца кошты на некаторыя тавары і паслугі (лекі, камунальныя паслугі, арэнда памяшканняў, мытныя плацяжы), «але дзяржаве ад гэтага стане толькі лягчэй».

«Рэфармаваць эканоміку ўсё роўна прыйдзецца. Інакш праз год-другі ўсё паўторыцца», - рэзюмуе Арцюгін.