Мінюст Літвы: У гэтым годзе Беларусь хацела атрымаць інфармацыю пра восем чалавек

У гэтым годзе розныя беларускія ведамствы значна актывізавалі паляванне за фінансавымі дадзенымі.

На працягу першых шасці месяцаў гэтага года было атрымана восем такіх запытаў, хоць у мінулым годзе за той жа перыяд - толькі адзін.

З васьмі атрыманых у гэтым годзе запытаў на атрыманне прававой дапамогі і раскрыццё фінансавай інфармацыі Міністэрства юстыцыі задаволіла два. У абодвух выпадках гэта закранула звязаных з апазіцыяй дзеячоў - Літва Менску перадала інфармацыю аб праваабаронцах Алесі Бяляцкім і Валянціне Стэфановічы.

«З атрыманых у мінулым годзе запытаў аб прадастаўленні прававой дапамогі задаволен быў адзін. У гэтым годзе - два. Ажыццяўленне прававой дапамогі датычнае іншых запытаў аб прававой дапамозе спыненае», - сказала DELFI дарадца міністра юстыцыі Вайда Вінцэвічутэ.

Субяседніца не ўдакладніла, ці з'яўляюцца апазіцыянерамі іншыя шэсць чалавек, фінансавымі аперацыямі якіх у Літве цікавіцца КДБ Беларусі. Тым не менш, Міністэрства юстыцыі можа гарантаваць, што больш дадзеных, якія могуць нанесці шкоду лідэрам апазіцыі, не было перададзена.

«У цяперашні час вывучаюцца ўсе акалічнасці гэтага інцыдэнту ў створанай указам прэм'ер-міністра працоўнай групе, у якой удзельнічаюць розныя ўстановы (у тым ліку Міністэрства юстыцыі, Міністэрства замежных справаў, Дэпартамент дзяржаўнай бяспекі, Генеральная пракуратура). Больш падрабязныя каментары мы зможам даць, толькі калі працоўная група прадставіць свае высновы», - сказала В. Вінцэвічутэ.

Нагадаем, што міністр юстыцыі Рэмігіюс Шымашус не спяшаецца вінаваціць сваіх падначаленых у прадастаўленні інфармацыі Беларусі. Міністр прыносіць прабачэнні за інцыдэнт і абяцае Бяляцкаму і іншым дзеячам апазіцыі дапамогу.

А. Бяляцкі быў затрыманы ў Менску 4 жніўня. На падставе дадзеных, прадстаўленых Літвой, яму прад'яўленыя абвінавачванні ва ўтойванні падаткаў.

Мінюст Літвы сцвярджае, што не будзе праводзіць ўнутранае расследаванне па гэтым інцыдэнце.

Міністэрства прызнае, што ў чэрвені атрымала папярэджанне МЗС не дапамагаць службам Беларусі, але было ўжо позна, бо беларускі бок атрымаў жаданую інфармацыю яшчэ ў сакавіку.

Прэзідэнт Даля Грыбаўскайтэ сцвярджала, што пасля прадастаўлення інфармацыі Беларусі Шымашус павінен ацаніць працу сваіх падначаленых. У мінулы чацвер высветлілася, што інфармацыю аб банкаўскіх рахунках Бяляцкага прадаставіла Беларусі не толькі Літва, але і Польшча.

У Польшчы вінаватыя ў перадачы дадзеных банкаўскіх рахункаў беларускага праваабаронца Алеся Бяляцкага былі звольненыя. Шэраг супрацоўнікаў пракуратуры былі адпраўленыя ў адстаўку за «неналежнае выкананне абавязкаў».