Бухулік трэба весці па афіцыйным курсе Нацбанка

Ва ўрадзе Беларусі не разглядаецца магчымасць змены парадку бухуліку курсавых розніц ў сувязі з адкрыццём дадсесіі на біржы, дзе валюта прадаецца і набываецца па рынкавым курсе.

Аб гэтым паведамілі агенцтву «Інтэрфакс-Захад» прадстаўнікі профільных ведамстваў.

Эксперты патлумачылі, што ў Беларусі для мэтаў бухуліку выкарыстоўваецца і будзе выкарыстоўвацца афіцыйны курс Нацыянальнага банка. У адпаведнасці з дзеючым парадкам, пры продажы замежнай валюты падаткам на прыбытак (24%) абкладаецца розніца паміж курсам Нацбанка і фактычным курсам продажу (за вылікам камісійных), якая для мэтаў падаткаабкладання разглядаецца ў якасці прыбытку.

Такім чынам, пры продажы замежнай валюты на дадсесіі, база для падатку на прыбытак павялічваецца на розніцу паміж курсам дадсесіі (Br8,6 тыс./$1 на 14 верасня) і афіцыйным курсам Нацбанка (Br5347/$1 на 14 верасня), якая будзе лічыцца прыбыткам.

Па экспертнай адзнацы, такі парадак будзе стрымліваць выхад высокарэнтабельных прадпрыемстваў-экспарцёраў на біржу з мэтай продажу замежнай валюты на дадсесіі, бо павялічваецца іхняя падаткаабкладаемая база.

Пры набыцці замежнай валюты на выдаткі ставіцца фактычны курс яе набыцця, што ўзмацняе наяўнасць сталага высокага попыту на дадсесіі.