Пратасеня: Не рабіце з мяне ні героя, ні здрадніка (Відэа)

Вызвалены палітвязень распавёў, што напісаў на імя Лукашэнкі прашэнне аб памілаванні, у якім прызнаў сваю віну і пакаяўся.

«Усё тое ж самае я казаў і на судзе. Мая віна ў тым, што раззброіў міліцыянта - забраў у яго шчыт, наносіў удары па шчытах», - дадаў Андрэй Пратасеня у інтэрв'ю Белсату.

Яму прапаноўвалі падпісаць прашэнне аб памілаванні раней - напярэдадні 11 жніўня, калі сваім указам Лукашэнка вызваліў 9 палітвязняў, аднак Андрэй Пратасеня адмовіўся гэта зрабіць. «Чаму я спачатку адмовіўся, а потым пагадзіўся - цяжка растлумачыць. Проста прыміце гэта як факт. Не трэба з мяне рабіць героя, не трэба з мяне рабіць здрайцу. Каб гэта растлумачыць - трэба кнігу напісаць», - заявіў Андрэй Пратасеня.

«Героі - тыя, хто не прызнаў сваёй віны ў тым, чаго яны не здзейснілі. І яны не здраджваюць свайму імені, сумленню і стаяць да канца. Я захапляюся Мікітам Ліхавідам - у газеце пісалі, што ён адкрыта супрацьстаіць гэтай сістэме. Я ім захапляюся, ён захаваў свой гонар і сумленне», - дадаў Пратасеня.

Учора на волю выйшлі чацвёра палітвязняў: Алесь Кіркевіч, Зміцер Даронін, Алег Гнедчык і Андрэй Пратасеня. Паводле звестак прэс-службы Лукашэнкі, адпаведны ўказ Аляксандр Лукашэнка падпісаў пасля разгляду прашэнняў гэтых грамадзянаў. «Асуджаныя заявілі, што раскайваюцца, прызнаюць віну і супрацьпраўны характар ​​сваіх дзеянняў і гатовыя надалей строга прытрымлівацца заканадаўства Беларусі», - гаворыцца ў паведамленні.