Віктар Івашкевіч: Улада будзе шкодзіць цішком

Арганізатары прызнвчанай на 8 кастрычніка акцыі «Народны сход» збіраюцца актывізаваць працу па інфармаванні насельніцтва аб мэтах правядзення мерапрыемства.

Пра гэта 23 верасня на прэс-канферэнцыі ў Менску паведаміў адзін з ініцыятараў акцыі Віктар Івашкевіч.

Палітык распавёў таксама, што ў ноч на 23 верасня на офіс прафсаюза радыёэлектроннай прамысловасці, дзе размешчаны аргкамітэт «Народнага сходу» быў здзейснены напад: чорнай фарбай аблітыя дзверы, разбітае шкло аднаго з вокнаў. Арганізатары акцыі расцанілі дадзенае здарэнне як правакацыю, якая не перашкодзіць іхняй працы.

«Улада доўга не звяртала ўвагі на нашыя дзеянні. І вось звярнула. Вядомыя некалькі выпадкаў затрымання людзей, якія збіралі подпісы за правядзенне «Народнага сходу». Улада не ведае, якія ў краіне ёсць законы. Нам у міліцыі кажуць, што мы парушаем закон аб масавых мерапрыемствах, хоць ён не распаўсюджваецца на арганізатараў мясцовых сходаў. Міліцыя кіруецца не законамі, а тэлефоннымі распараджэннямі сваіх начальнікаў. Нашыя дзеянні цалкам законныя», - заявіў Віктар Івашкевіч.

Па фактах парушэнняў заканадаўства арганізатары акцыі «Народны сход» маюць намер звяртацца ў пракуратуру, у міжнародныя палітычныя арганізацыі ў Еўропе, у прафсаюзныя аб'яднання.

«Я перакананы, што ўлада не пойдзе на масавы разгон, бо яна збіраецца ўдзельнічаць у «круглых сталах» з Еўропай. Гэта паказалі «маўклівыя акцыі» пратэсту 21 верасня. Улада будзе шкодзіць цішком», - сказаў Віктар Івашкевіч.

Пасля правядзення акцыі 8 кастрычніка, арганізатары плануюць арганізаваць «Народны сход» не пазней за 12 лістапада, куды павінна будзе прыйсці больш людзей. Для гэтага яны збіраюцца арганізаваць актыўную кампанію па інфармаванні грамадзянаў аб мэтах правядзення акцыі.