«Рэч Паспаліта»: Гандаль з тэрарыстам

Польская газэта «Рэч Паспаліта» піша пра закрытую сустрэчу прэм'ер-міністра Дональда Туска з лідэрамі ЕЗ.

На закрытай сустрэчы з лідэрамі Еўразвяза ўвечары 29 верасня ў Варшаве прэм'ер-міністр Польшчы Дональд Туск павінен быў агучыць прапанову патрабаваць ад афіцыйнага Менска не адстаўкі Аляксандра Лукашэнкі, а правядзення дэмакратычных парламенцкіх выбараў і поўнай амністыі палітвязняў, піша БелаПАН.

Наўзамен Менск мог бы разлічваць, акрамя іншага, на крэдыт Міжнароднага валютнага фонду, падтрымку Еўрапейскага банка рэканструкцыі і развіцця і Еўрапейскага інвестыцыйнага банка.

Польскае выданне таксама адзначае, што да прапановы Туска крытычна ставяцца ў беларускай апазіцыі. Напрыклад, экс-кандыдат у прэзідэнты Беларусі Алесь Міхалевіч назваў гэтую ідэю гандлем з тэрарыстам.

Пры гэтым «Рэч Паспаліта» паведамляе аб учорашняй сустрэчы Міхалевіча і некалькіх іншых беларускіх апазіцыянераў з канцлерам ФРГ Ангелай Меркель, якая запэўніла іх у тым, што Германія будзе рашуча дамагацца ад афіцыйнага Менска вызвалення палітвязняў.