Ірына Халіп: Я распавяду пра ўсё пазней, калі прыйду ў сябе

Журналістка Ірына Халіп з 7 па 9 верасня наведала з доўгатэрміновым спатканнем ў Наваполацкай калоніі свайго мужа, кандыдата ў прэзідэнты Андрэя Саннікава.

Як паведаміла Халіп БелаПАН, Саннікаў на здароўе «асабліва не скардзіцца». «Сур'ёзных захворванняў у яго няма. Але любы арганізм ва ўмовах калоніі дае збой. З'яўляецца кашаль, напрыклад. Асабліва, калі чалавек, як Саннікаў, працуе на экалагічна шкоднай вытворчасці», - сказала Халіп.

Нагадаем, Саннікаў быў размеркаваны ў 3-й атрад наваполацкай калоніі № 10. Ён працуе ў 30-й брыгадзе, якая на вытворчасці ў калоніі збірае скрыні з гофракардону.

«Гэта праблема не толькі Саннікава, гэта праблема ўсіх зняволеных, якія працуюць на такіх вытворчасцях», - адзначыла Халіп.

Больш падрабязна аб сваім доўгатэрміновым спатканні Ірына Халіп абяцала распавесці пазней. «Мне трэба ўзяць тайм-аўт хоць бы на суткі для таго, каб асэнсаваць і пераварыць усё тое, пра што мы з ім размаўлялі падчас спаткання. Зараз я не гатовая даваць каментары. Магчыма, штосьці я распавяду пазней, калі прыйду ў сябе», - сказала Халіп.

14 мая суд Партызанскага раёна Менска прысудзіў Саннікава да пяці гадоў пазбаўлення волі з адбываннем пакарання ў калоніі ўзмоцненага рэжыму. 15 ліпеня Менскі гарадскі суд пакінуў без задавальнення касацыйную скаргу палітыка.