Сакратар ЦВК: Гэтыя дэбілы пасадзілі нас пад хатні арышт

Мікалай Лазавік лічыць, што заходніх назіральнікаў не варта запрашаць для назірання за «выбарамі».

Не запросяць іх да таго часу, пакуль Еўразвяз не адменіць візавыя санкцыі, у тым ліку, у дачыненні да арганізатараў мінулых, прэзідэнцкіх «выбараў».

«У мяне наогул ёсць прапанова іх не запрашаць. А калі і запрашаць, то толькі пасля таго, як яны адменяць свае штрафныя санкцыі», - заявіў сакратар беларускага ЦВК агенцтву «Інтэрфакс-Захад» у сераду.

«Гэта павінна быць, напэўна, галоўнай умовай для запрашэння еўрачыноўнікаў у якасці назіральнікаў, па-за залежнасцю ад таго, ці будуць гэта амбасадары краін ЕЗ, ці гэта будуць міжнародныя арганізацыі, якія сфальсіфікавалі вынікі назірання», - сказаў М. Лазавік.

Акрамя таго, па ягоных словах, «наогул місію АБСЕ запрашаць будзе неяк некарэктна». «Па сутнасці справы, мы па віне АБСЕ знаходзімся нібыта пад хатнім арыштам, мы - неўязныя ў Еўропу. Узнікае пытанне, у якасці каго прыедуць еўрачыноўнікі да нас: у якасці назіральнікаў або наглядчыкаў? Хутчэй, як наглядчыкі. Каб не ставіць іх у няёмкае становішча, я б наогул не стаў бы іх запрашаць», - адзначыў прадстаўнік Цэнтрвыбаркама. Пры гэтым М. Лазавік удакладніў, што «гэта маё асабістае меркаванне, дадзеныя пытанні вырашаю не я, а надзеленыя Канстытуцыяй дзяржаўныя інстытуты - прэзідэнт і парламент».

М. Лазавік паведаміў, што раней група cябраў ЦВК звярнулася ў Еўразвяз з лістом, у якім пыталіся, на якой падставе іх пазбавілі права ўезду ў Еўропу. «Адказ адпавядае маёй характарыстыцы еўрачыноўнікаў - «еўрадэбілізм», - заявіў сакратар камісіі. Пры гэтым ён працытаваў адказ, атрыманы з генеральнага сакратарыята Рады ЕЗ. «Рада мяркуе, што звесткі, выкладзеныя ў вашым лісце, не апраўдваюць зняцце абмежаванняў, мер ЕЗ супраць вас. Рада застаецца пры сваім меркаванні, што абмежавальныя меры супраць вас апраўданыя. Сябры ЦВК Бушная, Бушчык, Кісялёва, Падаляк былі ўключаныя ў рашэнне Рады ЕЗ, якое датычыцца абмежавальных мер супраць прэзыдэнта Лукашэнкі і некаторых афіцыйных асоб, па наступных падставах: «сябар ЦВК», - працытаваў М. Лазавік.

«Атрымліваецца, што ўдзел у ЦВК з'яўляецца, на думку еўрачыноўнікаў, злачынствам. Я не магу паважаць тых еўрачыноўнікаў, якія без усякіх падставаў абмяжоўваюць правы і свабоды грамадзян толькі таму, што яны займаюць нейкую пасаду», - заявіў сакратар ЦВК Беларусі.