Анастасія Палажанка: Няхай задумаюцца аб тым, што за беззаконне трэба адказваць

Нявеста лідэра «Маладога фронту» Зміцера Дашкевіча Анастасія Палажанка пракаментавала магчымасць арышту Куляшова.

Дзяўчына лічыць, што прадстаўнікі ўладаў, якія маюць дачыненне да парушэння правоў чалавека і здзеку над беларусамі, павінныя задумацца аб наступствах бязмежжа, якое яны ладзяць - калі не ў Беларусі, то хоць бы перад выездам з краіны.

«Калі яны не задумваюцца аб адказнасці дома - хай задумаюцца аб тым, што за беззаконне трэба адказваць, хоць бы перад далёкай дарогай у Еўропу. Хай у сваіх спробах ў абыход «чорных спісаў» патрапіць у Еўропу супрацоўнік КДБ, МУС, прадстаўнікі Цэнтрвыбаркама або набліжаныя да «цела» бізнесмены спачатку падумаюць: «А ці варта мне ехаць? Ці не сустрэнуць мяне судовым пазовам, ці не арыштуюць калі што?», - сказала Палажанка «Беларускаму партызану».

Нагадаем, што французскі адвакат Уільям Бурдон 19 студзеня ў Парыжы падаў судовы пазоў супраць міністра ўнутраных спраў Беларусі Анатоля Куляшова, які знаходзіцца зараз у Францыі.

Бурдон дзейнічае ад імя ініцыятывы Free Belarus Now, якая абвінавачвае кіраўніцтва сваёй краіны ў арганізацыі катаванняў палітвязняў.

На думку адваката, французская паліцыя павінная неадкладна арыштаваць Куляшова, які знаходзіцца ў французскім Ліёне на канферэнцыі Інтэрпола. Бурдон патлумачыў, што следчыя абавязаныя высветліць ступень удзелу кіраўніка беларускага МУС у разгонах выступленняў апазіцыі і далейшых катаваннях арыштаваных у Менску людзей.

Адвакат абвясціў, што прадстаўляе частку тых апазіцыянераў, якія былі арыштаваныя 19 снежня 2010 года на мітынгу супраць фальсіфікацыі прэзідэнцкіх выбараў у Менску.