Хаўруснікі Лукашэнкі сталі міжнароднымі злачынцамі

20 студзеня завяршыўся візіт у штаб-кватэру Інтэрпола ў французскім Ліёне кіраўніка МУС Беларусі Анатоля Куляшова.

Гэты візіт трапіў у СМІ ў сувязі з тым, што адвакат Уільям Бурдон 19 студзеня падаў ў французскі суд пазоў да міністра Куляшова. Адвакат лічыць, што французская паліцыя павінная неадкладна яго арыштаваць. Ці атрымаецца Куляшову пазбегнуць арышту?

Прадстаўнік амбасады Францыі ў Менску патлумачыў «Радыё Свабода», што амбасада не можа каментаваць, як будуць дзейнічаць французскія ўлады ў сувязі з пазовам.

Дыпламат сказаў, што пра пазоў да Куляшова яму вядома са СМІ. На ягоны погляд, галоўнае, што Францыя, дзе размяшчаецца штаб-кватэра Інтэрпола, не магла не выдаць візу міністру Куляшову і перашкаджаць прыезду прадстаўніка гэтай арганізацыі. І тут у Францыі «не было выбару, як весціся», яна выканала свае міжнародныя абавязальніцтвы. Таму ажыятаж вакол візіту Куляшова выкліканы тым, што людзі могуць гэтага не ведаць. Французскі дыпламат параўнаў сітуацыю з той, калі ЗША выдалі візу прэзідэнту Ірана, каб той наведаў штаб-кватэру ААН у Нью-Ёрку. Па словах дыпламата, міністр Куляшоў таксама мае дыпламатычны пашпарт. Разам з тым Куляшоў не меў ніякіх кантактаў з афіцыйнымі асобамі Францыі.

Адвакат Уільям Бурдон лічыць, што следчыя абавязаныя высветліць ступень удзелу міністра Анатоля Куляшова ў падаўленні выступленняў апазіцыі ў снежні 2010 года і катаваннях арыштаваных. Ягоны пазоў, накіраваны ў французскі суд, датычыцца таксама Аляксандра Лукашэнкі. Кіраўнік Свабоднага тэатра Мікалай Халезін, які з'яўляецца адным з заснавальнікаў кампаніі Free Belarus Now, растлумачыў:

«Адвакат дзейнічае па сігнале кампаніі Free Belarus Now, каардынатар якой - Ірына Багданава, сястра Андрэя Саннікава, і пры садзейнічанні нашых адвакатаў McCue&Partners LLP. Яму прадстаўлены кейс, сабраны на Лукашэнку і ягоных набліжаных. На падставе гэтага кейса французы мелі права яго арыштаваць. Але адмовіліся гэта рабіць у сілу таго, што ў яго дыппашпарт, і ён прыехаў па запрашэнні міжнароднай структуры. Нібыта Францыя не мае да гэтага дачынення, бо офіс міжнароднай структуры знаходзіцца ў Францыі. Па гэтай справе пакуль не спрацавала, але спрацуе з кім-небудзь іншым».

Рэдактарка ​​сайта charter97.org, палітычная бежанка Наталля Радзіна, якая цяпер знаходзіцца ў Літве, адзначыла, што падача пазову на міністра Куляшова ў французскі суд - гэта правільны крок і беспрэцэдэнтны выпадак.

«Нават калі на гэты раз не атрымалася арыштаваць Куляшова, то тое, што адбылося, сведчыць аб тым, што беларускія чыноўнікі сёння, хаўруснікі Лукашэнкі, якія прымаюць удзел у рэпрэсіях, - гэта міжнародныя злачынцы. Пытанне ў тым, што трэба шукаць механізмы, каб яны панеслі пакаранне за тое, што робяць. Але тое, што яны зараз будуць сцерагчыся ездзіць па свеце, і тое, што яны зараз з'яўляюцца міжнароднымі злачынцамі, гэта факт».